Millət vəkili Qənirə Paşayeva bu gün İğdır Əslsiz Erməni İddialarıyla Mücadilə Dərnəyi (ASİM-DER) İdarə heyəti başqanı Göksal Gülbəylə görüşüb.
Deputatın Modern.az saytına verdiyi məlumata görə, görüşdə qondarma erməni soyqırımı yalanlarının ifşa olunması ilə bağlı ictimai birliklərin üzərinə düşən vəzifələr, özəlliklə, ASİM-DER-in bu günədək gerçəkləşdirdiyi işlər barədə fikir mübadiləsi aparılib.
Millət vəkili istər qondarma erməni soyqırımı ilə bağlı, istərsə də ermənilərin XX yüzilliyin əvvəllərində Türkiyənin Quzey-batısında, eləcə də 1918-ci ilin mart ayında Azərbaycanın əksər bölgələrində Bakıda, Şamaxıda, Qubada və digər bölgələrdə, yüzilliyin sonunda – 26 fevral 1992-ci ildə isə Xocalıda törətdiyi əsl soyqırım aktları, bu həqiqətlərin dünya ictimaiyyətinə çatdırılması ilə bağlı görülməsi mümkün və qaçılmaz olan tədbirlər barədə öz fikir və mülahizələrini bölüşüb.
Bu mövzuda bir neçə kitab və sənədli film müəllifi olduğunu xatırladan xanım millət vəkili Azərbaycanla bağlı gerçəkliyin nəinki xarici ölkələrdə, beynəlxalq təşkilatlarda gərəyincə bilinmədiyini, bəzən qardaş ölkələrimizin bir çox vətəndaşlarının belə bu həqiqətlərə vaqif olmadığını dilə gətirib. Odur ki, ASİM-DER kimi ictimai təsisatların uyğun birliklərlə əməkdaşlıq şəraitində daha təsirli tədbirlər görməsi, özəlliklə üç ölkənin sərhəddində yerləşən İğdır kimi önəmli bir məkanda fəaliyyət göstərməyin mahiyyətinə varmaqda fayda olduğunu vurğulayıb.
ASİM-DER İdarə heyəti başqanı Göksal Gülbəy indiyədək gerçəkləşdirmiş olduqları işlər barədə məlumatların əks olunduğu qovluğu millət vəkilinə təqdim edərək, təmsil etdiyi dərnəyin planlaşdırdığı yeni layihələr barədə məlumat verib.
Türkiyəli qonaq millət vəkilinin bu ilin may ayında Azərbaycan Xalq Cümhuriyyətinin elan olunduğu 28 may günü ərəfəsində, habelə respublikamızın öz dövlət müstəqilliyini bərpa etməsinin 20-ci ildönümü ilə bağlı tədbirlər keçirmək təklifini mənuniyyətlə dəyərləndirəcəklərini qeyd edib.
Modern.az
