Klassik Xalq Cəbhəsi Partiyasının (KXCP) sədri Mirmahmud Mirəlioğlu Azərbaycan Xalq Cəbhəsi Partiyasının (AXCP) adı uğrunda mübahisələrə münasibət bildirərkən tərəfələrin iddialarını əsassız sayıb. O, Modern.az-a açıqlamasında deyib ki, nə Əli Kərimlinin partiyası, nə də Razi Nurullayevin təşkilatını əsl cəbhə hesab edir. Partiya sədrinin fikrincə, əsl cəbhə elə özünün rəhbərlik etdiyi Klassik Xalq Cəbhəsi Partiyasıdır.
Mirəlioğlunun dediklərinə münasibət bildirən Razi Nurullayev düşünür ki, onun üçün önəmli olan xalqın yeni AXCP-ni tanımasıdır:
“Şükürlər olsun ki, kənar fikirlərə də hörmətlə yanaşmağı bacarırıq. Biz təkliflərə, tövsiyələrə, iradlara və tənqiqlərə açıq partiyayıq. Vacib olan xalqın bizi AXCP kimi tanımasıdır. Bu da baş verməkdədir. Bundan da önəmli olan Rəsulzadə-Elçibəy ideyalarının yaşadılması, bu ideyalar uğrunda mücadilə edilməsidir. Bu mücadiləni də şərəf və ləyaqətlə yerinə yetiririk. Biz uzun müddət adından və nüfuzundan sui-istifadə edilən Elçibəyə sahib çıxmışıq. Təmənnasız və əvəzsiz. Çünki, biz siyasi mübarizəmizdə Elçibəy səmimiyyətini əsas seçmişik. Şükürlər ki, Elçibəy dühası və zəkası yolumuzu işıqlandırır və Allahın köməkliyi ilə xalqı da bu işıqlı yol ilə aparacağıq.
Bütün Elçibəyçilərə və Elçibəy adından istifadə edən partiya və təşkilatılara da sözüm budur ki, bizə qoşulsunlar. Gücümüzü birləşdirək və Böyük Bəyin ideyalarını yaşadaq, həyata keçirək. Bu ideyanın məğzində dayanan qaye Azərbaycan xalqına layiq olduğu həyatı verməkdir”.
Qeyd edək ki, hazırda Əli Kərimlinin sədrlik etdiyi AXCP-nin adına onun eks-müavini Razi Nurullayevin rəhbəri olduğu təşkilat da iddia edir. R.Nurullayev AXCP-dən ayrılan bir qrupla eyni adlı partiya yaratdığını bəyan etsə də, rəhbərlik etdiyi siyasi təşkilat hələ ki Ədliyyə Nazirliyi tərəfindən qeydiyyata alınmayıb.
Günay RƏSULQIZI
