Sosial evlərə qeydiyyat başladıqdan sonra güzəştli mənzil almaq istəyən vətəndaşların qeydiyyatdan keçmə vaxtının onların ev almaq imkanlarına təsirləri olacaqmı?
Modern.az xəbər verir ki, iqtisadçı Vüqar Bayramov vətəndaşları maraqlandıran bu kimi suallara aydınlıq gətirib. O deyib ki, qeydiyyatdan keçmək vaxtı sosial mənzilə sahib olmaq imkanlarına təsir göstərmir:
“Bəzi vətəndaşlarımız daha qısa zamanda qeydiyyatdan keçməyə çalışırlar. Qeyd edək ki, bu mərhələdə nə zaman qeydiyyatdan keçmək sosial mənzil almaq imkanlarına təsir göstərmir”.
V.Bayramovun sözlərinə görə sosial evlərə elektron müraciətin iki mərhələdə həyata keçirilməsi nəzərdə tutulur:
“Artıq birinci mərhələ başlayıb və bu zaman sadəcə qeydiyyatdan keçmək tələb olunur. İkinci mərhələdə isə qeydiyyatdan keçən vətəndaşlara mənzil seçimi ilə bağlı müraciət ünvanlanacaq. Məhz bu zaman müraciətə daha tez cavab vermək və mənzili seçmək çox vacib olacaq.
Yəni, birinci mərhələdə tez müraciət vacib olmasa da ikinci mərhələdə “ilk müraciət ilk mənzil” prinsipi tətbiq ediləcək. Bu baxımdan, ikinci mərhələdə mənzil almaq istəyən vətəndaşlarımızın daha tez müraciəti olduqca vacibdir”.
Mütəxəssis deyib ki, sosial mənzilə sahib olmaq istəyən vətəndaşların hammısının qeydiyyatdan keçməsinə ehtiyac var:
“Hər bir vətəndaşın bu hüquqdan bir dəfə faydalanmaq imkanı var. Eyni zamanda, ilk il 2 minə yaxın sosial mənzil təklif edilərsə də, sonrakı illər hər il 3 min güzəştli mənzilin satılması nəzərdə tutulur. Bu isə o deməkdir ki, sosial mənzil almaq üçün indi şəxsi kabinet yaradıb hətta gələcəkdə bu hüquqdan faydalanmaq olar”.
Gülşən RAUFQIZI
