Bu gün Milli Məclisin Səhiyyə Komitəsinin iclası keçirilib. Modern.az xəbər verir ki, millət vəkili Qənirə Paşayeva vərəm xəstələrinin məcburi müalicəyə cəlb olunmasına çağırıb.
Q. Paşayeva bildirib ki vərəm xəstələrinin məcburi dövlət hesabına müalicəyə cəlb edilməsi, əhalinin vərəmlə bağlı maarifləndirmə işlərinin surətləndirilməsi və vərəmli xəstələrin davamlı tibbi nəzarətdə saxlanılması ilə bağlı işlər surətlənməlidir: ”Millət vəkili seçildiyim bölgədə bir ailəni ziyarət edirdim. Ata açıq vərəm xəstəsidir. Onunla bir otaqda bütün ailə yaşayır və davamlı təmasda idilər. Kiçik yaşlı nəvə onun çarpayısında düz yanında oturmuşdu. Deyirəm belə olmaz hamınız vərəmə yoluxa bilərsiniz. Görürəm heç bu barədə xəbərləri belə yoxdur. Bir neçə ay əvvəl isə dəhşətli bir hadisənin şahidi oldum. Əksər üzvləri vərəmə yoluxmuş bir ailəni ziyarət etdim. Ata vərəmdən əziyyət çəkirmiş, bu gün isə bütün ailə. Ailədə çalışacaq adam da yox idi. İndi düşünün həmin ailədəki uşaqlar məktəbə gedir və sabah nə olacaq kimsə bilmir. Ona görə vərəm xəstələrinin məcburi müalicə müəsisələrində dövlət hesabına müalicəyə cəlb edilməsi ilə yanaşı əhalinin bununla bağlı geniş maarifləndirilməsinə də ehtiyac var. İnsanlar bilmədirlər ki ailədə vərəm xəstəsi varsa, müalicəsini gecikdirmək olmaz, mütləq həkimə, bu sahədə tibb müəsisəsinə müraciət etmək lazımdır. Xəstəlik başqalarının yoluxa bilməsi üçün təhlükəli mərhələdədirsə insanların evdə həmin xəstə ilə, onun əşyaları ilə ünsiyyəti necə olmalıdır”.
"Vərəmlə mübarizədə bütün dünyanada olduğu kimi Azərbaycanda müvafiq qurumların, cəmiyyətin mübarizəsi genişlənməlidir"- deyən millət vəkili bildirib ki, bu məsələnin səhiyyə komitəsinin xüsusi diqqətində olmasına, müvafiq qurumlarla birlikdə müzakirələrə, qanuna təkrar baxılmasına, KİV-lərin də dəstəyi ilə əhalinin maarifləndirilməsinin genişlənməsinə böyük ehtiyac var.
Modern.az
