2017-ci ilin yaz sessiyasında Milli Məclisdə bir neçə qanunlara əlavə və dəyişikliklər edildi.
Yaz sessiyasında qəbul olunmuş ən vacib qanun layihələri hansılardır? Sessiya hansı müzakirələrlə yadda qaldı?
Məsələ ilə əlaqədar olaraq Modern.az saytı bir neçə deputatın fikrini öyrənib.
Milli Məclisin əmək və sosial siyasət komitəsinin sədri Hadi Rəcəbli bildirib ki, yaz sessiyası bir neçə qanunların qəbul edilməsi ilə yadda qalıb.
“Bu sessiya ərzində bizim komitədə iki önəmli qanun hazırlanıb və bir neçə qanunlara dəyişiklik edilib. Bunlar "Tütün məmulatlarının istifadəsinin məhdudlaşdırılması haqqında" və “Turizm haqqında” qanundur. Mən hesab edirəm ki, bu qanunlar qəbul ediləcək. Bu qanun layihələrinin üzərində çoxlu iş aparılıb. Həmçinin biz bir neçə qanunlara əlavələr və dəyişikliklər etmişik. Bunlardan biri “Əmək pensiyaları haqqında” qanun idi. Həmçinin, hazırda komitədə bir neçə qanun layihəsi var ki, onun da üzərində işlər aparılır. Mən hesab edirəm ki, bizim komitə ilə yanaşı, digər komitələrdə də mühüm qanunlar qəbul edildi və ya dəyişikliklər edildi. Bunların hamısı ölkəmizin inkişafına və vətəndaşlarımızın rifahının daha da yaxşılaşdırılmasına hesablanıb. Payız sessiyası ərzində də Milli Məclisdə mühüm qanunların qəbulu gözlənilir və bir neçə önəmli qanunlara dəyişikliklər ediləcək”.
Milli Məclisin Regional məsələlər komitəsinin üzvü Cavid Osmanov 2017-cı ilin yaz sessiyasında parlamentdə mütərəqqi qanunların qəbul olunduğunu deyib.
“Azərbaycan dövlətçiliyi naminə, ölkəmizdə gedən iqtisadi-sosial proseslərin davamı olan qanunvericilik bazasının təkmilləşdirilməsi istiqamətində xeyli işlər aparılıb və qanunlar qəbul edilib. Bəzi təkliflər qanun formasında qəbul olunub. Azərbaycanın bugünkü və gələcək inkişafına yönələn bütün məsələlər Milli Məclisdə müzakirə olunub və deputatlar tərəfindən dəstəklənib. Bu baxımdan bütün qanunlar dövlət quruculuğu istiqamətində çox vacibdir. Buna görə də düşünürəm ki, 2017-ci ilin yaz sessiyası hüquqi cəhətdən mühüm sənədlərin qəbulu ilə yadda qalıb. Hesab edirəm ki, bütün qəbul edilmiş və ya dəyişiklik edilmiş qanunlarımız dövlətimizin və vətandaşlarımızın xeyrinə hesablanıb”.
Milli Məclisin Müdafiə, Təhlükəsizlik və Korrupsiyaya qarşı mübarizə komitəsinin üzvü Elman Məmmədov deyib ki, parlament yaz sessiyasında kifayət qədər uğurlu fəaliyyət göstərib.
“Təbii ki mən Müdafiə, təhlükəsizlik və korrupsiyaya qarşı mübarizə komitəsinin üzvü kimi deyə bilərəm ki, hərbi istiqamətdə olan qanunları və onlara dəyişiklikləri önəmli sayıram. Bunlar çox vacibdir. Həmçinin, iqtisadi sahədə aparılan islahatların tənzimlənməsi üçün işlər görülüb. Eyni zamanda sosial, tibb, yol hərəkətinin təşkili ilə bağlı olan qanunlarımıza əlavələr və dəyişikliklər çox vacibdir. Bunların içərisində isə mənim üçün ən vacib olanı ordumuzun, müdafiə qüdrətimizin, ölkəmizin təhlükəsizliyinin təmin olunması üçün qanunlar və onlara dəyişikliklərdir. Çünki bu istiqamətdə aparılan işlər ordumuzun güclənməsinə xidmət edir. Bu da gələcəkdə torpaqlarımızın gələcəkdə düşməndən azad olunmasına gətirib çıxaracaq”.
Milli Məclisin İqtisadi siyasət, sənaye və sahibkarlıq komitəsinin üzvü Əli Məsimli hesab edir ki, 2016-cı ildən başlanan islahatlar 2017-ci ildə də davam edib.
“Əvvəlki dövrlə müqayisədə Milli Məclisin icra orqanları ilə islahatların hüquqi bazasının möhkəmləndirilməsi, genişləndirilməsi istiqamətində görülən işlərdə çox effektiv əməkdaşlıq həyata keçirilib. İqtisadiyyatın liberallaşdırılması istiqamətində yeni qanunların qəbul edilməsi və dəyişikliklərin edilməsi mühüm əhəmiyyət kəsb edir. Sahibkarlığa ciddi zərər vuran məsələrdən biri lisenziya idi. Çünki kiminsə əlində 200 min manat pulu varsa, hesab edirdi ki, 150 minini texniki iqtisadi əsasnaməni yürütməyə, 50 minini isə maneəni ortadan qaldırmağa yönəldəcək. Amma ilk mərhələdə onun əlində olan 200 min manatın 150-ni istəyirdilər. Beləliklə də o sahibkarın inkişaf etməsinin qarşısı alınırdı. Lisenziyaların sayının kəskin surətdə azaldılması, eyni zamanda ölkə prezidentinin bilavasitə bu sahəyə ciddi təsiri ilə yoxlamaların sayı azaldıldı. Bu çox mühüm əhəmiyyət kəsb edir. Çünki bir ilin ərzində birdən-birə yoxlamaların sayı 1000 dəfə azaldıldı. Burada ola bilər ki, bəzi mənfi məqamlar olsun. Amma yoxlamaların azaldılmasında müsbət məqamlar çoxdur. Ona görə də, mən bütün qəbul edilmiş və ya dəyişiklik edilmiş qanunları önəmli sayıram”.
Mirmahmud KAZIMOĞLU
