Hazırda Bakı-Şamaxı avtomobil yolunun 76-cı kilometrliyində, Ceyrankeçməz dərəsində dünən sel sularının yaratdığı problem aradan qaldırılıb, nəqliyyatın hərəkəti bərpa edilib.
Bu haqda Modern.az-a "Azəravtoyol" ASC-nin mətbuat xidmətinin rəhbəri Anar Nəcəfli məlumat verib.
A.Nəcəfli yolun bağlanmasına səbəblərini də açıqlayıb. O deyib ki, sel suları özü ilə gətirdiyi qaya parçaları, lil qatını körpünün üstünə atıb:
“Nəticədə yol bağlanıb və avtomobillərin hərəkətində problem yaranıb. “Azəravtoyol”un əməkdaşları kompleks şəkildə ərazidə problemin aradan qaldırılması istiqamətində tədbirlər həyata keçirib. Mövsümdən asılı olaraq ərazidə intensiv yağışlar müşahidə olunur”.
İyunun 1-i axşam saatlarında yağan güclü leysan yağışından sonra dağlardan gələn sel suları Qobustan rayonu ərazisindən keçən magistral avtomobil yolunda nəqliyyatın hərəkətini dayandırıb.
Sel suları Bakı-Şamaxı avtomobil yolunun 76-cı kilometrliyində, Ceyrankeçməz dərəsi adlanan əraziyə toplanaraq, orada gölün əmələ gəlməsinə və nəticədə magistral yolun bağlanmasına səbəb olub.Yol bir neçə saat bağlı qaldığı üçün Bakıdan Şamaxı istiqamətinə və əks tərəfə gedən 500-dən çox avtomobil yolda qalıb.
Gülşən RAUFQIZI
