3 ilə yaxındır erməni girovluğunda saxlanılan azərbaycanlı Dilqəm Əsgərov atasının ölümü barədə məlumatlandırılıb. Xatırladaq ki, D.Əsgərovun atası Qardaşxan Əsgərov bu ilin mart ayında uzun sürən xəstəlikdən sonra vəfat edib.
Həmin vaxt girovun oğlu Kürdoğlu Əsgərov Modern.az-a açıqlamasında “Babam sağdır, ölümü barədə xəbər yalandır” təkzibini versə də, sonradan məlumatı gizlətməyin əbəs olduğunu anladı.
O, Modern.az-a növbəti açıqlamasında məsələyə aydınlıq gətirib:
“Yuxarı instansiyalardan mənə məsləhət gördülər ki, babamın ölüm xəbərini gizlədim. Qorxduq ki, xəbər atama çatanda ona pis təsir edər. Ümumi razılıq əsasında bunu mətbuatdan gizlətməyə çalışdım. Amma əmim babamın öldüyünü açıqlayandan sonra gizlətmək mümkün olmadı”.
K.Əsgərov sonuncu dəfə atasına martda məktub yazdığını bildirib:
“O vaxtdan bəri ondan heç bir məlumat almamışıq”.
Beynəlxalq Qırmızı Xaç Komitəsinin Bakı nümayəndəliyinin İctimaiyyətlə əlaqələr şöbəsinin rəhbəri İlahə Hüseynova Modern.az-a deyib ki, Dağlıq Qarabağda saxlanılan azərbaycanlılara sonuncu başçəkmə mart ayında olub. “Növbəti başçəkmə baş tutanda ictimaiyyət məlumatlandırılacaq”.
2014-cü il iyul ayında Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcərdə öz ata-baba yurdlarını ziyarət etmək istəyərkən Ermənistan Silahlı Qüvvələri tərəfindən girov götürülüblər, Azərbaycan vətəndaşı Həsən Həsənov isə güllələnərək öldürülüb. H. Həsənovun meyiti düşməndən alınaraq Bakıda dəfn edilib.
İşğal altındakı Dağlıq Qarabağda D. Əsgərov və Ş. Quliyev üzərində “məhkəmə” qurulub. “Məhkəmə”nin qərarı ilə D. Əsgərov ömürlük, Ş. Quliyev isə 22 il müddətinə azadlıqdan məhrum edilib.
Gülşən RAUFQIZI
