Jurnalist Əfqan Muxtarlı barəsindəki cinayət işi araşdırılması üçün Baş Prokurorluğun Ağır cinayətlərə dair işlər üzrə istintaq idarəsinə verilib.
Bu haqda Modern.az-a onun hüquqlarını müdafiə edən vəkil Elçin Sadıqov məlumat verib.
Bu gün keçirilən məhkəmə prosesində jurnalist barəsində seçilən həbs qətimkan tədbirindən verilən şikayət təmin edilməyib.
Hüquq-mühafizə orqanlarının məlumatına görə, Ə.Muxtarlı mayın 29-da saat 22.40 radələrində Balakən rayonu ərazisində Azərbaycan dövlət sərhədini qanunsuz keçdikdən sonra Dövlət Sərhəd Xidmətinin əməkdaşları tərəfindən saxlanılıb. Saxlanılarkən Ə.Muxtarlı xidmət əməkdaşlarına müqavimət göstərib. Ə.Muxtarlı inzibati qaydada tutularaq üzərində şəxsi axtarış keçirilib, ondan külli miqdarda nağd pul vəsaiti və digər əşyalar aşkarlanaraq götürülüb.
Ona Cinayət Məcəlləsinin CM-nin 318-ci (Dövlət sərhədinin qanunsuz olaraq keçmə) və 206-cı (qaçaqmalçılıq), 315-ci maddəsi (Hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə ittiham irəli sürülüb.
Səbail rayon Məhkəməsində Əfqan Muxtarlı barəsində 3 aylıq həbs qətimkan tədbiri seçilib.
Gülşən RAUFQIZI
