“Azərbaycanda müasir tələblərə cavab verən antikorrupsiya qanunları var və Azərbaycanda korrupsiyaya qarşı mübarizə dövlət siyasətidir".
Modern.az xəbər verir ki, bunu Bakıda keçirilən İqtisadi Əməkdaşlıq Təşkilatına üzv dövlətlərin prokurorluq, ixtisaslaşdırılmış korrupsiyaya qarşı mübarizə qurumları rəhbərliyi və ombudsmanların III görüşündə baş prokurorun müavini, Korrupsiyaya qarşı Mübarizə Baş İdarəsinin rəisi Kamran Əliyev bildirib.
K. Əliyev deyib ki, Azərbaycanda korrupsiyaya qarşı mübarizə 6 prinsip üzərində qurulub.
“Azərbaycan 2004-cü ildən başlayaraq beynəlxalq səviyyədə antikorrupsiya konvensiyalarına qoşulub, qanunvericiliyini təkmilləşdirib.
Azərbaycanda üç pilləli məhkəmə sistemi var. Məhkəmə-Hüquq Şurası bu sahədə önəmli qurumdur. İdarəçilikdə şəffaflığa gəlincə, hüquq-mühafizə orqanlarına əməkdaşlar test yolu ilə qəbul edilir, eyni zamanda elektron hökumət, "ASAN xidməti" qeyd etmək vacibdir.
Azərbaycanda iki antikorrupsiya qurumu Korrupsiyaya Qarşı Mübarizə üzrə Komissiya və baş prokuror yanında Korrupsiyaya Qarşı Mübarizə Baş İdarəsi mövcuddur. Korrupsiyaya Qarşı Mübarizə Baş İdarəsi yeganə cinayət təqibi orqanıdır”.
K. Əliyev bildirib ki, korrupsiyaya qarşı mübarizə ilə əlaqədar QHT-lərlə və beynəlxalq təşkilatlarla sıx əməkdaşlıq edilir.
Mirmahmud KAZIMOĞLU
