Fransız-Azərbaycan Universitetinə (UFAZ) builki qəbul üçün iki qeydiyyat mərhələsi nəzərdə tutulub. Qeydiyyatdan keçən abituriyentlər iyulun 27-də keçiriləcək imtahanda iştirak edə biləcəklər.
Bu barədə Fransız-Azərbaycan Universitetindən Modern.az-a verilən məlumatda bildirilib.
2017-2018-ci tədris ili üçün 120 ödənişsiz, 40 ödənişli yer nəzərdə tutulur. Bu ildən UFAZ xarici tələbələrə də öz qapılarını açır.
Xatırladaq ki, bu, 2014-cü ildə Azərbaycan və Fransa Prezidentlərinin təşəbbüsü ilə başladılmış və uğurla davam edən layihədir. 2016-cı ilin sentyabr ayından etibarən fəaliyyət göstərən bu universitetdə 4 texniki ixtisas üzrə (Kompüter elmləri, Kimya mühəndisliyi, Geofizika mühəndisliyi, Neft-qaz mühəndisliyi) tələbələr təhsil alır.
Universitet Azərbaycan Dövlət Neft və Sənaye Universiteti (ADNSU) nəzdində yaradılıb və məzunlarını ADNSU və Strasburq Universitetinin diplomları ilə təmin etməyi nəzərdə tutub. Universitetdə təhsil Fransa təhsil sisteminə uyğunlaşdırılmış formada yüksək ixtisaslı Fransa və Azərbaycan müəllimlərindən ibarət beynəlxalq tədris heyəti tərəfinən aparılır. Təhsil 1 hazırlıq ili və 3 il bakalavr olmaqla, 4 ildən ibarətdir.Hazırlıq ilində tələbələrə intensiv ingilis və fransız dili dərsləriylə bərabər, əsas texniki fənlər keçirilir.
2016/2017-ci qəbul ilində Universitetə 143 tələbə qəbul edilib. Dövlət İmtahan Mərkəzinin 1-ci ixtisas qrupu üzrə imtahanından 500-dən çox bal toplayan abituryentlər ADNSU-nun binasında Strasburq Universitetinin apardığı imtahanda iştirak etmiş və onların arasında ən öndə gedən tələbələr UFAZ-da təhsil almaq haqqını qazanıb.
UFAZ ilk öncə güclü elmi hazırlıqlı, elementar ingilis dili biliyinə sahib, orta məktəbi yeni bitirən və Dövlət İmtahan Mərkəzinin imtahanından, həmçinin Bakıda Strasburq Universiteti tərəfindən təşkil edilən UFAZ-a qəbul imthanından müvəffəqiyyətlə keçən Azərbaycan abituriyentlərini axtarır.
Artıq ikinci qəbul ilinə hazırlaşan UFAZ iyunun 2-də ADNSU-nun rektoru Mustafa Babanlı və Fransanın Azərbaycandakı səfiri Orelia Buşezin iştirakı ilə mətbuat konfransı, daha sonra isə ADNSU-nun akt zalında rektor Mustafa Babanlı, UFAZ-ın Direktoru Vazeh Əskərov, UFAZ-ın Şarlot Payen “Açıq qapı” günü keçirərək Universitetə qəbul ilə bağlı məlumat vermiş və şagirdlərin və valideynlərin bütün sualları cavablandırılıb.
Namidə Bingöl
