Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvü, Tərxis Olunmuş Hərbçilərin Gəncləri Maarifləndirmə İctimai Birliyinin sədri Emin Həsənlinin Modern.az saytına müsahibəsini təqdim edirik:
- Emin müəllim, ötən ilin aprel hadisələrindən sonra sanki cəmiyyətdə döyüş ab-havası dəyişib. Sanki cəmiyyətdə baş verən hadisələr insanların döyüşmək barədə düşüncələrini arxa plana çəkib. Sizcə, qısa zaman kəsiyində unutqanlığımızın səbəbi nədir?
- Unutqanıq deməzdim. Sabah müharibə olarsa, Azərbaycan xalqının toparlanması məsələsi yenidən gündəmə gələcək. Biz bu cür etapları keçmişik. İstər 20 Yanvar hadisələri olsun, istərsə də ulu öndər Heydər Əliyevin ikinci dəfə hakimiyyətə qayıdışı və onun xalqa müraciətləri. Bunlar Azərbaycan xalqının nə dərəcədə vətənpərvər olduğunu söyləməyə əsas verən amillərdir. Son aprel hadisələri zamanı da xalqımızın gücünü görə bildik. İnsanlar küçələrə axışdılar, binalardan üçrəngli bayrağımız dalğalanırdı. Şəhidlərin əvvəlki şəhidlərdən fərqli dəfn mərasimi keçirildi. Aprel hadisələrindən sonra Türkiyədən nümayəndə heyəti Azərbaycana gəlmişdi. Ardınca biz Türkiyəyə səfər etdik. Səfər çərçivəsində Türkiyənin müharibə veteranları deyirdi ki, artıq Azərbaycanı nümunə kimi göstəririk. Açığı deyim ki, əvvəllər Türkiyə xalqının. ordusunun müharibə və döyüş təcrübəsindən nümunələr gətirirdik. Aprel hadisələrindən sonra Azərbaycan xalqının vətənpərvərlik nümunələri yaranıb. Aprel hadisələri xalqımızın mənəvi, vətənpərlik gücünü göstərmiş oldu.
- Maraqlıdır, bu məsələdə cəmiyyət olaraq hansı işləri həyata keçirə bilirik?
-Hər an səfərbər olmaq ənənəsi var. Dövlətimiz bu məsələdə çox yaxşı inkişaf edir. Medianın üzərinə çox böyük iş düşür. Mediamız 2014-cü ilin avqustunda buraxdığı səhvləri 2016-cı ilin aprelində təkrarlamadı. Sevindirici haldır ki, vətəndaş cəmiyyəti - QHT-lərimiz vahid bir mövqedən çıxış edirlər. Bu gün kənardan baxanda görürük ki, Azərbaycanda elə bir gənclik yetişir ki, onlar heç zaman torpaqların işğal faktı ilə barışmayacaq. Hər hansı situasiyada səfərbər olmağı bacarır. Aprel hadisələri zamanı nə qədər məktəbli cəbhə bölgəsinə getməyə can atırdı. 10 minlərlə gənc orduya yollanmaq üçün müraciət edirdi. Demək olar ki, 2016-cı ilin aprel hadisələri hərtərəfli diqqət mərkəzində oldu. Hər kəs öz üzərinə düşən işin öhdəsindən layiqli şəkildə gələ bildi.
- Dediklərinizlə razıyıq. Reallıq odur ki, indi sakitlikdir. Aprel hadisələri təkrarlanacağı halda, cəmiyyət və xalq olaraq birmənalı şəkildə gücümüzü göstərəcəyik. Amma stabil şəraitdə təbliğat işini necə qurmalıyıq?
- QHT-rə Dövlət Dəstəyi Şurası bu istiqamətdə layihələr verir. Mən də Şura üzvüyəm. Ötən il cənab prezidentin dəstəyi ilə bəyan edilmişik. Cənab prezidentin yanında Gənclər Fondu bu istiqamətdə layihələri maliyyələşdirir. Gənclər və İdman Nazirliyi, Təhsil Nazirliyi bu istiqamətdə xeyli işlər görür. Orta məktəbdə uşaqlara hərbi-idman oyunları keçirilir. 2012-ci ilin fevralında yaradılmış Səfərbərlik və Hərbi Xidmətə Çağırış üzrə Dövlət Xidməti gənclərin orduya yola salınma, qarşılanma mərasimlərini yüksək səviyyədə həyata keçirir. Hər rayonda ehtiyatda olan hərbçilərinin iştirakı ilə “Vətənin müdafiəsinə hazıram” adlı tədbirlər keçirilir. Biz gənclərin vətən uğrunda döyüşmək əzminin şahidi oluruq. Jurnalistlər, gənclər, QHT-lər arasında atıcılıq kursları keçirilir. Bu il aprelin 1-dən 20-nə qədər respublikanın bütün bölgələrdə şəhidlərimizin ildönümləri keçirildi. Məktəblər, universitetlər səfərbərlik xidməti QHT-lə birgə şəhidlərimizin yas mərasimində iştirak edirdilər. Bu istiqamətdə işlər davam edir. Sevindirici haldır ki, biz bu məsələdə əlimizdən gələni əsirgəmirik.
- Qarşıdan Ordumuzun 99-cu ildönümü gəlir. Nə işlər planlaşdırırsız?
- Planlar çoxdu. Bu istiqamətdə xeyli işlər görüləcək. Həmçinin, gələn il həm Cümhuriyyətimizin, həm də Ordumuzun 100 illiyi qeyd olunacaq. Bu istiqamətdə xeyli işlər görüləcək. Tədbirlər planı hazırlanır və bu tədbirlər proqramında QHT-lər də öz üzərinə düşən işi yerinə yetirəcək. Həm ölkə daxilində, həm də ölkə xaricində Azərbaycanın haqq səsini çatdıracağıq. Bu ilin may ayında Türkiyədə səfərdə olduq. Müharibə veteranları, şəhid ailələri ilə görüşlər keçirdik. Həmin görüşə aprel döyüşlərində əlil olmuş insanları apardıq. Görüşlər çərçivəsində Azərbaycan-Türkiyə münasibətlərindən söhbət açdıq. Türkiyəli qazilər hər zaman Azərbaycan uğrunda döyüşməyə hazır olduqlarını bildirdilər. Növbəti belə görüş iyulun 5-də Bakıda baş tutacaq. Rusiya, Türkiyə və Azərbaycanın ehtiyatda olan generalları, müharibə veteranları ilə əməkdaşlıq məsələsi gündəmə gələcək və regional təşkilat yaradılacaq. Düşünürük ki, gələcəkdə bu təşkilat beynəlxalq status alacaq. Regional dövlətlər terrora, işğala son qoyulması istiqamətində dünyada baş verən haqsızlıqlara qarşı birgə mübarizə aparacaqlar.
Namidə BİNGÖL
