Böyük Britaniyada növbədənkənar parlament seçkiləri keçirilib.
Seçkilərin nəticəsindən asılı olaraq 650 deputatdan ibarət İcmalar Palatasının yeni tərkibi müəyyənləşəcək. 3304 namizədin mübarizə apardığı seçkidə təkbaşına hökumət qurmaq istəyən partiya 326 deputat yeri əldə etməlidir.
Qeyd edək ki, seçicilər ölkə üzrə 40 min seçki məntəqəsində səs veriblər. Britaniyada səsvermə hüququ olan 46,4 milyon seçici var.
Modern.az xarici KİV-ə istinadən xəbər verir ki, ilkin nəticələrə görə, seçkilərdə hazırki baş nazir Tereza Meyin başçılıq etdiyi Mühafizəkarlar Partiyası daha çox deputat yeri əldə edib. Hələlik Mühafizəkarların 300, leyboristlərin 250, Şotlandiya Milli Partiyasının 34, Liberal Demokratik Partiyasının 11 mandat əldə etdiyi bildirilir. Digər partiyalar isə 21 mandat qazanıb. Səslərin hesablanması davam etdirilir.
Təkbaşına hökumət qurmaq istəyən partiya 650 yerdən 326 deputat yerinə malik olmalıdır.
Baş nazir Tereza Mey ilkin nəticələr açıqlandıqdan sonra çıxış edərək deyib: “Nəticələr nə olursa-olsun, ölkəmizin sabitliyə ehtiyacı var. Biz Mühafizəkarlar Partiyası olaraq, bu sabitliyin saxlanılması üçün əlimizdən gələni edəcəyik”.
Bundan əvvəl mühafizəkarlar parlamentdə 330 deputatla təmsil olunurdu. Baş nazir Tereza Mey Maidenhead bölgəsindən parlamentə üzv seçilib.
Modern.az
