Şəki Şəhər İcra hakimiyyəti Şəki Qarışıq tipli Uşaq evində yaşayan Hüseynova Aysel Vasif qızının döyülərək işgəncə verilməsilə bağlı açıqlama verib.
İcra Hakimiyyətinin Yetkinlik yaşına çatmayanların işləri və hüquqlarının müdafiəsi üzrə komissiyanın uşaqlarla iş üzrə - məsləhətçi psixoloqu Xəyalə Bəkirova Modern.az-a hazırda araşdırma aparıldığını bildirib:
“Şəki Şəhər Rayon Polis Şöbəsinə daxil olan müraciət üzrə araşdırma aparılır. Ombudsman Elmira Süleymanovanın tapşırığına əsasən, Şəki Regional Mərkəzinin əməkdaşları da iyunun 7-də Şəki Qarışıq tipli Uşaq evində olub. Araşdırma tam başa çatdıqdan sonra ictimaiyyətə məlumat veriləcək”.
24 aprel 1998-ci il təvəllüdlü Aysel Hüseynova 2007-ci ildən Şəki Qarışıq tipli Uşaq evində tərbiyə olunur və hazırda Peşə məktəbində təhsil alır. Bu müəssisəyə nənəsi tərəfindən gətirilib. Ayselin atası vəfat edib, anası isə Qax Rayon Məhkəməsinin qətnaməsinə əsasən 2013-cü ildə valideynlik hüququndan məhrum edilib.
“Uşaq evlərinə qayğı” İctimai Birliyinin rəhbəri Sahib Teymurov Şəki Qarışıq tipli Uşaq evinin müəlliməsi Mirvari Əsgərova tərəfindən döyülərək işgəncəyə məruz qaldığını iddia edir.
Gülşən RAUFQIZI
