Sabah Dünya Çempionatı-2018-in seçmə mərhələsi çərçivəsində növbəti oyunlar keçiriləcək.
C qrupunda 7 xalla 4-cü yerdə qərarlaşan Azərbaycan milli komandası vacib oyunda Şimali İrlandiya ilə qarşılaşacaq.
Qrupda bir çox məsələyə aydınlıq gətirəcək matç, milli komandamız üçün mühüm əhəmiyyət kəsb edir.
Azərbaycan futbol komandasının köməkçi məşqçisi Mahmud Qurbanov oyunla bağlı fikirlərini Modern.az saytına bildirib.
“Bu matç yığma üçün, mən deyərdim ümumiyyətlə Azərbaycan futbolu üçün çox əhəmiyyətli bir oyundur. Əlbəttə, qalib gəlmək istəyirik. Çünki doğma meydanda oynayacağıq. Şimali İrlandiya çətin və güclü rəqibdir. Buna baxmayaraq düşünürəm ki, ev amili, azarkeşlərin dəstəyi və bizim qalibiyiyyət arzumuz sabahkı oyunda qələbə qazanmağımıza kömək edər”.
M.Qurbanov Ş.İrlandiya ilə olan oyuna yaxşı hazırlaşdıqlarını deyib:
“İstər futbolçular, istərsə də məşqçi heyəti olaraq qalib gəlib xal ehtiyaımızı artırmaq istəyirik. Düşünürəm ki, bunun üçün futbolçular əzmkarlıqlarını meydançada göstərəcəklər. Avstriyada milli komanda ilə uğurlu bir hazırlıq müddəti keçdik. Oyunun başlanmasına 1 gün qalıb. Məqsədimiz sabah bizə lazım olan xalı əldə etməkdir”.
Qeyd edək ki, Azərbaycan - Şimail İrlandiya matçı iyunun 10-da saat 20:00-da start götürəcək.
Oyun Tofiq Bəhramov adına Respublika Stadionunda keçiriləcək.
Məcid Əmirov
