Azərbaycanda 2018-ci ildə növbəti prezident seçkisi keçiriləcək.
Maraqlıdır, siyasi partiyalar seçkilərə namizədləri haqda düşünüblərmi? Modern.az saytı bu suallarla partiyalara mürtaciət edib.
Azərbaycan Demokrat Partiyasının (ADP) sədri Sərdar Cəlaloğlu bildirib ki, bunun haqqında əvvəlcədən nəsə planlaşdırmaq və ya hansısa addım atmaq çətindir.
“Azərbaycanda formal proseslər var və biz də hökumət, xalq, partiya olaraq onun ətrafında fəaliyyət göstəririk. Ona görə də Don Kixotluq etmək lazım deyil. Ümumiyyətlə siyasi partiyaların əsas işi ictimai-siyasi hadisələrdə, xüsusilə demokratik proseslərdə iştirak edib, onların mövcudluğunu qorumaqdır.
Bir var bu prosesdən istifadə edib nailiyyət əldə edirsən, bir də var sadəcə qoruyursan. Əgər biz seçkilərdə iştirak etməsək, o demokratik prosedur kimi sıradan çıxacaq. Seçkilərlə bağlı nəhəng müddəalarımız olmadığına görə qeyri-adi strateji hədəfimiz də yoxdur. Bunun sadəcə texniki tərəflərinə hazırlaşmaq lazımdır”.
Partiya sədri deyib ki, yalnız seçkilərə start veriləndən sonra bu haqda düşünmək olar:
“Seçkidən qabaq təbliğat qeyri-qanuni olduğu üçün bu cür məsələləri indidən müzakirə edə bilmərik. Birincisi, partiyaların rəhbər orqanları yığışıb seçkidə iştirakın effektliyi məsələsini müəyyən etməlidirlər. Əgər iştirak olacaqsa, bunu necə edəcəyik? Yəni öz namizədlərimizi irəli sürəcəyik, yoxsa başqa namizədləri dəstəkləyəcəyik? Partiya kənardan bir namizəd gətirib dəstəkləyə bilər. Dünya təcrübəsində də belə hallar var. Azərbaycanda partiya lideri olmaq o demək deyil ki, namizədliyini irəli sürməlisən.
Bütün bu məsələlər partiyanın rəhbər orqanları tərəfindən qərara bağlanmadığına görə, mən partiyanın seçkilərdə iştirakı və ya namizdələri ilə bağlı hər hansı konkret bir şey deyə bilmirəm. Ona görə də biz partiyanın rəhbər orqanlarının müzakirələrə başlamasını gözləməliyik”.
Klassik Xalq Cəbhəsi Partiyasının (KXCP) sədri Mirmahmud Mirəlioğlu qeyd edib ki, namizdələrlə bağlı məsələ hələ ki müzakirə edilməyib:
“Yəqin ki, uyğun strukturlarda məsələ müzakirə olunandan sonra bu barədə münasibətimiz bilinəcək. Hələ ki prezident seçkilərinə namizədlərin təyin edilməsi müzakirə mövzusu olmayıb”.
REAL hərəkatının icraçı katibi Natiq Cəfərlinin sözlərinə görə, prezident seçkilərinə namizəd artıq müəyyən edilib:
“2013-cü ildə bizim namizədimiz İlqar Məmmədov oldu, imza toplasaq da, qeydiyyata alınmadı. 2018-ci ildə də namizədimiz İlqar Məmmədov olacaq. O vaxta kimi də İlqar Məmmədovun azad olunmasına və prezident seçkilərinə aktiv qoşulmasına ümid edirik. İnanırıq ki, Avropa Məhkəməsinin qərarı yerinə yetiriləcək və onun üzərində olan məhkumluq götürüləcək. Başqa bir namizəd haqqında bu günə qədər nə müzakirələr aparmışıq, nə də düşünmüşük”.
Azərbaycan Milli İstiqlal Partiyasının (AMİP) Siyasi Şurasının üzvü Əli Orucov bildirib ki, 2018-ci ildə keçiriləcək prezident seçkilərinə partiyanın namizədləri haqda hələ ki, müzakirə aparılmayıb.
Ümid Partiyasının sədri İqbal Ağazadə namizədin yalnız qurultay keçiriləndən sonra müəyyən olunacağını qeyd edib:
“Artıq bir neçə rayonlarda konfranslarımız keçirilib. Seçkidə iştirak qərarını və namizədi yalnız qurultayda müəyyən edə bilərik. Başqa heç bir orqan bununla bağlı qərar verə bilməz”.
Müsavat Partiyasının mərkəzi icra aparatının rəhbəri Gülağa Aslanlının sözlərinə görə partiyanın prezidentliyə namizədi vaxtı gələndə müəyyən ediləcək.
Azərbaycan Liberal Partiyasının (ALP) sədri Əvəz Temirxan:
“Hələ prezident seçkilərinə çox var. Ona görə də hələ namizəd müəyyən edilməyib. Lakin rəsmi olmasa da, əgər iştirak edəcəksə, bizim öz namizədimiz var”.
Günay RƏSULQIZI
