Azərbaycan Tibb Universitetinin (ATU) Böyük Elmi Şurasının qərarı ilə universitetin rektoru yanında İctimai Nəzarət və Məsləhət Şurasının yaradılması qərara alınıb və onun 9 nəfərdən ibarət tərkibi formalaşıb.
Şuranın tərkibinə tələbə və valideynlər də daxil edilib. Şuranın sədri “Əhalinin sağlamlığının qorunmasına kömək” İctimai Birliyinin sərdi, Milli Məclisin deputatı, həkim qastroenteroloq İlham Məmmədov, sədr müavini ATU-nun əczaçılığın texnologiyası və idarəçiliyi kafedrasının baş müəllimi Aidə Bəndəliyeva, şuranın katibi isə Əhməd Abbasbəyli seçilib.
Deputat İ.Məmmədov, uzun illər tibb sahəsində parlamentdə qanunvericiliyin möhkəmləndirilməsi istiqamətində, həmçinin, “Əhalinin sağlamlığının qorunmasına kömək” İctimai Birliyinin sədri kimi vərəm xəstəliyi, siqaret və narkotik vasitələrin istifadəsinin qarşısının alınmasında mühüm maarifləndirmə tədbirləri həyata keçirib.
İ.Məmmədov Modern.az-a deyib ki, İctimai Nəzarət və Məsləhət Şurasının yaradılması sosial sifarişdir:
“Cənab prezidentimiz də dəfələrlə deyib ki, dövlət və hökumət qurumları əhalinin rifah halının yaxşılaşması üçün daim çalışır. Bunun səmərəli və effektli olması üçün ictimai nəzarət çox vacibdir.
O zərurətdən də irəli gələrək Tibb Universitetində İctimai Nəzarət və Məsləhət Şurasının yaradılıb. İlk dəfə olaraq valideyn və tələbə həmin şurada təmsil olunur. Gələcəyimizin sağlamlığına xidmət edən təhsil ocağında verilən təhsil mükəmməl olmalıdır”.
İ.Məmmədov qeyd edib ki, yeni sistemlə əhali birbaşa təhsil prosesinin iştirakçısına çevriləcək:
“Gələcəyimiz, sağlamlığımız tibb təhsili alan tələbələrin peşəkarlığından asılı olacaq. Bu gün universitetin yeni rektoru, professor Gəray Gəraybəyli ilə yeni qiymətləndirmə metodları tətbiq olunur. İctimai Nəzarət Şurası da bu proseslərdə yaxından iştirak edəcək, tövsiyələrini verəcək, prosesin necə idarə olunmasından tutmuş tələbələrin təkliflərinə qədər bütün ümumiləşdirmələr rektor yanında Elmi Şuraya təqdim ediləcək.
Mən hesab edirəm ki, təhsil sistemindəki bütün neqativlərə, stereotiplərə son qoyulacaq”.
Gülşən RAUFQIZI
