Azərbaycanın böyük dostu, İstanbul Universitetinin professoru, dünya şöhrətli plastik cərrah, tarixi - etnoqrafik araşdırmalar müəllifi, ölkəmizin ən ağır günlərində yanımızda olan İbrahim Yıldırım iyunun 8-də Bakıya növbəti dəfə səfər edib.
Azərbaycana səfərinin məqsədini açıqlayan professor qeyd edib ki, gəlişində məqsəd tanınmış Azərbaycan ədibi, filosof və ədəbiyyat tənqidçisi, XX əsr Azərbaycan-Türk ictimai fikrinin ən görkəmli nümayəndələrindən biri, uzun müddət alim, həkim, rəssam, şair, tənqidçi, tərcüməçi, müəllim, jurnalist kimi fəaliyyət göstərmiş, bu sahələrin hər birində özünəməxsus izlər qoymuş, XX əsr Azərbaycan mətbuatı və publisistikası sahəsində müstəsna xidmətləri olan Əli bəy Hüseynzadənin müəllifi olduğu 160-dan artıq rəsm əsərinin və onun şəxsi əşyalarının Azərbaycanın İstiqlal Muzeyinə verilməsi ilə bağlı Mədəniyyət Nazirilyi tərəindən təşkil olunmuş rəsmi tədbirdə iştirak etməkdir.
Doktor İbrahim Yıldırımla söhbətimizdən məlum oldu ki, böyük ədibin qızı Feyzavər Alpsar tərəfindən qorunan Əli bəy Hüseynzadənin müəllifi olduğu 160-dan artıq rəsm əsərinin və onun şəxsi əşyalarının taleyi – onların gələcəkdə harada saxlanılması məsələsi beş ilə yaxındır ki, müzakirə olunur. Bu müzakirələrdə yaxından iştirak edən və Feyzavər xanımın atasnın yadigarlarını ən çox etibar etdiyi İbrahim Yıldırımın tövsiyəsi və təkidli xahişi ilə Əli bəy Hüseynzadəyə məxsus rəsmlərin və şəxşi əşyaların Azərbaycana gətirilməsi qərara alınıb. Feyzavər xanımın razılığından sonra doktor İbrahim Yıldırımın respublikamızın Mədəniyyət Nazirliyi və digər dövlət qurumları ilə əlaqə yaratması, müvafiq danışıqlar aparması, mütəxəssislərlə görüşməsi sayəsində Əli bəy Hüseynzadəyə məxsus rəsmlərin və şəxşi əşyaların Azərbaycana gətirilməsinə nail olunub.
İlham Cəmiloğlu
