Nizami adına Ədəbiyyat Muzeyində “Böyük İpək Yolu” Beynəlxalq Gənclər İttifaqının təşkilatçılığı və Gənclər və İdman Nazirliyinin dəstəyi ilə “Gənc Şairələrin Bakı Forumu” öz işinə başlayıb.
Modern.az xəbər verir ki, tədbirdə “Böyük İpək Yolu” BGT-nin sədri, Milli Məclisin Gənclər və İdman Komitəsinin sədri Fuad Muradov, Gənclər və İdman Nazirliyinin sektor müdiri Fuad Babayev, APA Holdinqin rəhbəri Vüsalə Mahirqızı, Moldovanın Azərbaycandakı səfiri George Leuka, yazıçı Günel Anarqızı, Təhsil Nazirliyi və Ədəbiyyat Muzeyinin səlahiyyətli şəxsləri çıxış ediblər.
Forumu giriş sözü ilə açan “Böyük İpək Yolu” BGT-nin baş katibi Aytən Əliyeva Forumun məqsədləri haqqında məlumat verib. Onun sözlərinə görə , 12 ölkədən Bakıya gələn gənc şairələr üçün bu tədbir dostluq və əməkdaşlıq bayramı olacaq.
Milli Məclisin Gənclər və İdman Komitəsinin sədri, “Böyük İpək Yolu“ BGT-nin sədri Fuad Muradov qeyd edib ki, keçirilən bu forum mədəniyyətlərarası dialoqa bir töhfədir:
“Azərbaycan prezidenti cənab İlham Əliyevin həyata keçirdiyi islahatlar, Heydər Əliyev Fondunun gördüyü çoxşaxəli işlərin mədəniyyət və ədəbiyyat sahələrində də öz təcəssümünü tapır.
Müxtəlif ölkələrdən gəlmiş gənclərin Bakıda toplanmasının həm ölkənin ədəbi mühitində, həm də iştirakçıların yaradıcılığında öz izini qoyacağına əminəm”- deyə F.Muradov vurğulayıb.
Deputat belə bir tədbirin tarixi məkanda – Nizami adına Ədəbiyyat Muzeyində keçirilməsinin də müsbət tərəflərini vurğulayıb. Həmçinin, bu formatda olan Forum və müxtəlif mərasimlərin muzeylərdə baş tutmasının vacibliyindən danışıb.
Millət vəkili Gənc Şairələrin Bakı Forumunun UNESCO tərəfindən ən yaxşı layihələrdən biri kimi qiymətləndirildiyini və artıq üç ildir keçirilən layihəyə ildən-ilə marağın artdığını əlavə edib.
Çıxış edənlər bu beynəlxalq Forumun artıq ənənəvi hal almasının müsbət aura yaratdığını vurğulayaraq, bu tədbirin dünyanın müxtəlif ölkələrindən gələn gənc şairələrin yaradıcılığında öz əksini tapacağına inandığını bildiriblər.
Qeyd edilib ki, artıq “Böyük İpək Yolu” BGT-nin bu forumçu artıq ənənəvi hal almaqdadır. Böyük İpək Yolu” nun qısa bir vaxt ərzində yaranmasına baxmayaraq, təşkilat artıq bir çox maraqlı layihələrə imza atıb. Şairələrin Beynəlxaq Forumu da bunlardan biridir. Forum həmçinin, müxtəlif ölkələrdən gəlmiş gənclərə Azərbaycanıə yaxından tanımaq imkanı yaradıb.
Forumda muzeyin əməkdaşı Azərbaycan şairəsi Xurşudbanu Natəvan haqqında geniş məlumat verib.
Daha sonra iştirakçı ölkələrin nümayəndələri öz şeirlərini oxuyublar.
Elmin Nuri
