Bu gün Azərbaycan Respublikasının Prezidenti yanında Dövlət İdarəçilik Akademiyasında “ASAN School” könüllülük məktəbinin “İnnovativ idarəetmə” platformasının növbəti qonağı Milli Məclisin deputatı Cavanşir Feyziyev olub. Modern.az xəbər verir ki, çıxışı zamanı Cavanşir Feyziyev sovet dövrünün təcrübəsini misal gətirərək indiki dövrün könüllülük fəaliyyətini müqayisəli formada təhlil edib. Bu baxımdan hazırkı gənclərin nə qədər şanslı olduğunu vurğulayıb: “Azərbaycan müstəqillik əldə edəndən sonra insanların azad düşünmək, hərəkət etmək imkanları yaranıb. Hazırda ölkəmizdə kifayət qədər Qeyri-hökümət Təşkilatları, mətbuat orqanları fəaliyyət göstərir. Bəzən say çoxluğu qınaq obyekti olsa da, bu düzgün yanaşma deyil”.
Deputat, həmçinin, ali təhsilin, o cümlədən könüllülük hərəkatının gənclər üçün önəmindən də bəhs edib. O qeyd edib ki, cəmiyyətin bütün üzvləri maariflənmək üçün çalışmalıdır:
“Bu gün cəmiyyətimiz üçün aktiv hərəkatlar, o cümlədən könüllülük fəaliyyəti gənclər üçün önəmli və faydalıdır. Bu, gənclərin şəxsi inkişafı və cəmiyyətin dünyagörüşünün formalaşması baxımından vacibdir”.
Cavanşir Feyziyev, həmçinin, dil bilgilərinin əhəmiyyətindən, biznes sahəsindəki fəaliyyəti fonunda gənclərə istənilən sahədə uğur qazanmaq yollarından söz açıb və hər şeydən öncə insanın özünə qarşı məsuliyyətli davranmalı olduğunu vurğulayıb.
200-dən çox ASAN könüllüsünün iştirak etdiyi görüşdə deputat gəncləri maraqlandıran sualları cavablandırıb.
Sonda Cavanşir Feyziyev könüllülərə daim aktiv, cəsarətli, müsbət əhval-ruhiyyədə olmağı tövsiyyə edərək onlara gələcək fəaliyyətlərində uğurlar diləyib.
Qeyd edək ki, 2015-ci ildən start götürən bu layihə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi və Dövlət İdarəçilik Akademiyasının birgə əməkdaşlığı ilə həyata keçirilir. Layihə çərçivəsində könüllülər ölkənin bir sıra tanınmış ictimai-siyasi, elm və mədəniyyət xadimləri ilə görüşmək imkanı əldə edərək, onları maraqlandıran suallar ünvanlayaraq cavab əldə etmə şansı qazanmış olurlar.
Günay RƏSULQIZI
