Modern.az saytı Moskvada yaşayan azərbaycanlı şairə Afaq Şıxlının şeirini təqdim edir.
Afaq Şıxlı
Görəsən, indi hardadır
Mənim maraqlı insanım?
Hər fəsildən yaz gözləyən,
Həmişə haqlı insanım?
Yəqin yenə gileylənir
Küləkli boz havalardan,
Yenə qaçır söz üstündə
Düşən yersiz davalardan?
Yenə də mahnı dinləmir,
Susur sükan arxasında,
Yenə sürür həyatını
Od ilə su arasında?
Yenə donub yalanlardan,
Qalın geyinir əynini,
Onun olmayan dünyada
İtmiş sayır əməyini?
Yenə qatıb-qarışdırır
Nisgilini zarafatla,
Hələ də barışa bilmir
Onu üzən boş həyatla?
Görəsən, hardadır indi
Mənim maraqlı insanım?
Hər yerdə düzlük axtaran
Əliçıraqlı insanım?..
05.06.17.
