Prezident İlham Əliyev iyunun 20-də Azərbaycan Respublikasının Dövlət Reklam Agentliyinin yaradılması haqqında Fərman imzalayıb. Fərmana əsasən, ölkə ərazisində açıq məkanda reklam daşıyıcılarının yerləşdirilməsi, həmin reklam daşıyıcıları üzərində yerləşdirilməsi nəzərdə tutulan reklamların istehsalı (hazırlanması) və yayımlanması sahəsində vahid tənzimləməni və nəzarəti təmin etmək məqsədilə “Azərbaycan Respublikasının Dövlət Reklam Agentliyi” publik hüquqi şəxs yaradılıb.
Dövlət Reklam Agentliyinin fəaliyyətinə Prezident tərəfindən vəzifəyə təyin edilən və vəzifədən azad edilən direktor rəhbərlik edir. Prezident Administrasiyası bu Fərmanda nəzərdə tutulmuş publik hüquqi şəxsin nizamnaməsinin layihəsini və təsisçisinin səlahiyyətlərini həyata keçirənlər barədə təkliflərini on beş gün müddətində hazırlayıb dövlət başçısına təqdim edəcək.
Prezidentin həmin gün imzaladığı Sərəncamla Aydın İbadov Dövlət Reklam Agentliyinin direktoru təyin edilib.
Azərbaycan Reklamçılar İttifaqı İctimai Birliyinin sədri Hacıəmi Atakişiyev Modern.az-a yeni yaradılan qurumun reklam bazarında önəmli rol oynayacığını vurğulayıb:
“Reklam sahəsində xaos var”
“Reklam Agentliyi «Reklam haqqında» qanuna əsaslanaraq işləməlidir. 2015-ci ildə “Reklam haqqında” qanun qəbul olundu. Qanunda çox dəyişikliklər nəzərdə tutulsa da, hazırda işlək deyil. Çünki yeganə olaraq Bakı Şəhər İcra Hakimiyyətinin (BŞİH) Reklam və İnformasiya İdarəsi qanunu saymadan fəaliyyət göstərir. Özləri istədiyi məbləği müəyyən edirlər.
Qanunun 26.2-ci bəndində göstərilib ki, açıq məkanda reklam yerləşdirmək üçün reklam yayıcısı müvafiq icra hakimiyyəti orqanından icazə almalı, ərazinin, daşınmaz əmlakın mülkiyyətçisi və ya onlar barədə sərəncam vermək hüququ olan şəxslə müqavilə bağlamalıdır. Həmin müqavilə əsasında müvafiq icra hakimiyyəti orqanı tərəfindən reklama dair texniki şərtlər pasportu hazırlanır. Reklama dair texniki şərtlər pasportu mülkiyyətçiyə təqdim edildikdən sonra reklam yerləşdirilə bilər. Reklama dair texniki şərtlər pasportunun formasını müvafiq icra hakimiyyəti orqanı təsdiq edir.
Yəni əgər mən reklam yerləşdirmək üçün fundament qazdıranda rabitə, elektrik kimi texniki xətləri zədələyə bilərəm. Ona görə də bu barədə texniki pasporta sahib olmalıyam. İki ildir qanun qəbul olunsa da idarə bu işlə məşğul deyil. Ona görə də prezidentin sərəncamı ilə Reklam Agentliyinin yaradılması uğurlu addımdır. Hazırda respublika üzrə reklam sahəsində bir xaos var. Hər gələn bir qiymət qoyur, istədiyi kimi danışıq aparır. Reklam agentlikləri də vəziyyətdən olduqca narazıdırlar”.
“5 günlük reklam üçün bir illik ödəniş alırlar”
H.Atakişiyevin sözlərinə görə, Agentliyin yaradılması respublikada reklam bazarının stabilləşməsinə səbəb olacaq:
“Bu gün reklamda qiymət yoxdur. İstəyən bir qiymət yazır, yoxlayan da yoxdur ki, kim haqlıdır, kim haqsızdır. Bütün bunlar yeni yaradılan Reklam Agentliyi tərəfindən araşdırılmalıdır və əsasnaməsində göstərilməlidir.
Tarif Şurası tərəfindən minimum və maksimum qiymətlər müəyyən olunmalıdır. Çünki elə reklam var ki, həcmi kiçikdir, eləsi var ki, şəhərdə bir neçə günlük qoyulmalıdır. Hansısa tədbirlə bağlı reklam qoyulur, tədbir bitir, növbəti mərhələ başlayanda belə, reklamlar hələ də yığışdırılmır. Çünki həmin reklamlar üçün sifarişçidən bir illik ödəniş tələb edilir”.
“Şəhərə çıxanda elə bilirsən başqa ölkədəsən”
Birlik sədri qeyd edib ki, dil məsələsi üçün xüsusi şöbə yaradılmalıdır:
“Jurnalistlər, filoloqlar, ədəbiyyat sahəsində çalışan adamlar ora cəlb olunmalıdır. Biz bütün dünya ilə inteqrasiya şəraitində yaşayırıq. Ona görə də çoxdilli reklamların olması da qəbulolunandır. Ölkəyə gələn turistlərin nəzərə alınması baxımından da xarici dil olmalıdır, amma ana dilimizi üstələməməsi şərtilə. Qanuna görə, birinci yerdə böyük hərflərlə azərbaycan dili olmalıdır, sonrakı yerlərdə kiçik hərflərlə xarici dildə verilə bilər. Amma bu gün şəhərdəki ticarət və xidmət obyektlərinin əksəriyyəti ya ingilis, ya rus, ya da türk dilindədir. Şəhərə baxanda elə bilirsən başqa ölkədəsən. Reklamçı pul ödəyir reklamını verir, amma əvəzində ona texniki pasport verilmir”.
H.Atakişiyev bildirib ki, yeni yaradılan qurumdan müraciət olarsa, ictimai təşkilat olaraq kömək etməyə hazırdır.
Gülşən RAUFQIZI
