ATƏT-in Minsk qrupunun həmsdərləri illərdir ki, Azərbaycan və Ermənistana səfər edir. Hər səfərdən sonra münaqişənin həlli ilə bağlı müsbət fikir formalaşmır. Beləcə, düz 25 ildir ki, Minsk qrupu Qarabağ münaqişəsinin həllinə nail ola bilmir.
Maraqlıdır, Azərbaycan Xarici İşlər Nazirliyi (XİN) həmsədrlərin regiona neçə dəfə səfər etməsinin statistikasını aparıbmı?
Xarici İşlər Nazirliyinin mətbuat xidmətinin rəhbəri Hikmət Hacıyev mövzu ilə bağlı Modern.az-a açıqlamasında deyib ki, Minsk qrupunun regiona neçə dəfə səfər etməsinin statistikasına yox, mahiyyətinə önəm veririk.
“Real statistikanın bir o qədər də tərəfdarı deyilik. Daha çox mahiyyətinə önəm veririk. Mahiyyət də ondan ibarət olmalıdır ki, 25 ildən artıq dövr ərzində danışıqlar aparılır, amma real nəticə yoxdur”-deyə XİN rəsmisi söyləyib.
H. Hacıyev bildirib ki, hələ də Azərbaycan əraziləri işğal altındadır.
“Məcburi köçkünlər doğma torpaqlarına qayıda bilməyib. Azərbaycan ərazi bütövlüyü və sabitliyi təmin olunmayıb. Bu əsnada bizim əsas hədəfimiz məsələnin mahiyyətidir. Real statistika hədəfimiz deyil”.
Namidə BİNGÖL
