Ermənistan Silahlı Qüvvələri iyulun 4-də saat 20 radələrində Azərbaycanın işğal olunmuş ərazilərindən Füzuli rayonunun Alxanlı kəndini minaatan və qumbaraatanlardan atəşə tutaraq, mülki əhalinin qəsdən öldürülməsi və vətəndaşların şəxsi mülkiyyətində olan əmlakın qəsdən məhv edilməsi məqsədilə növbəti təxribat törədib.
Nəticədə Alxanlı kənd sakinləri - 1966-cı il təvəllüdlü Allahverdiyeva Sahibə İdris qızı və onun nəvəsi 2016-cı il təvəllüdlü Quliyeva Zəhra Elnur qızı həlak olub, digər mülki şəxs 1965-ci il təvəllüdlü Quliyeva Səlminaz İltifat qızı isə ağır bədən xəsarətləri alaraq xəstəxanaya yerləşdirilib.
ATƏT-in Minsk qrupu isə həmişəki ampluasında qalaraq bir cümləlik - “Dağlıq Qarabağ münaqişəsi tərəflərini atəşkəs rejimini pozmağı dayandırmağa çağırırıq” bəyanatı ilə vəzifə səlahiyyətlərini “icra edib”.
Hadisə ilə bağlı Modern.az-a açıqlama verən deputat Vahid Əhmədov bu bəyanata hiddətini gizlətməyib:
“Füzulinin Alxanlı kəndində iki dinc sakinin ölümü, birinin isə ağır yaralanması ağır hadisədir. Bu, erməni vandalizminin növbəti nümunəsidir. Amma yeni Zəhralarımız ölməsin, analar gözü yaşlı qalmasın deyə, bu vandallığa son qoyulmalıdır.
ATƏT-in Minsk qrupu isə bu vəhşiliyin qabağında həmişəki heç bir işə yaramayan bəyanat yayıb. Onlar tərəfləri danışıqlar masasına oturmağa çağırır. Mən hesab edirəm ki, ATƏT-in Minsk qrupunun dinc vətəndaşların ölümü ilə bağlı açıqlaması əslində onların ikili siyasətinin bəyanatıdır. Dinc əhaliyə qarşı edilən bu vəhşilik qətiyyətlə pislənilməli, günahkarlar məsuliyyətə cəlb olunmalıdır. Beynəlxalq aləm məsələyə göz yummamalıdır. Mən ümumiyyətlə, ATƏT-in Minsk qrupunun bəyanatını qəbul etmirəm”.
V.Əhmədov bildirib ki, Azərbaycan ordusu ötən ilin “Aprel döyüşləri”ndə hansı gücə qadir olduğunu göstərib:
“Ordumuz düşmənin hücumlarını almağa qadirdir. Hesab edirəm ki, həmsədrlər gələcəkdə də belə münasibət sərgiləyəcəklərsə, ordu öz sözünü deməli, problemin həllini xalqla birlikdə öz üzərinə götürməlidir. Çünki gedişat torpaqların müharibə gücünə azad olunmalı olduğunu göstərir”.
Gülşən RAUFQIZI
