Qara Dəniz İqtisadi Əməkdaşlıq Təşkilatının (QDİƏT) 49- cu Baş Assambleyasının bu gün keçirilən iclasında Azərbaycanın ərazi bütövlüyünün və sərhəd toxunulmazlığının tanınması ilə bağlı Deklorasiya qəbul edilib.
Bu barədə Modern.az-a Qara Dəniz İqtisadi Əməkdaşlıq Təşkilatında Azərbaycan nümayəndə heyətinin üzvü, Milli Məclisin deputatı Musa Quliyev məlumat verib.
Deputat bildirib ki, bu gün keçirilən iclasda QDİƏT-in yaranmasının 25 illiyinə həsr olunmuş Deklorasiya qəbul edilib.
“Bu Deklorasiya ilk sənəddir ki, QDİƏT-ə üzv ölkələr bir-birinin ərazi bütövlüyünü və sərhəd toxunulmazlığını tanıyır. Müzakirələr zamanı bu prinsipin vacibliyi qeyd olundu”.
M.Quliyev qeyd edib ki, Ermənistan və Rusiya xaric QDİƏT-ə bütün üzv ölkələr sənədi dəstəkləyib.
“Sənəd 10 lehinə və 2 əlehinə səs olmaqla qəbul edildi. Amma sənəd ermənilərin təkidi ilə təkrar olaraq fərdi səsverməyə qoyuldu. Nəticədə sənədin 44 lehinə, 9 isə əlehinə səs verilməklə vacib tarixi qələbə qazandıq. Azərbaycan nümayəndə heyətinin gərgin əməyi öz bəhrəsini verdi”.
Qeyd edək ki, hazırda QDİƏT-də Azərbaycan nümayəndə heyətinin rəhbəri Milli Məclisin Aqrar Siyasət Komitəsinin sədr müavini Eldar Quliyevdir.
Mirmahmud KAZIMOĞLU
