Azərbaycan Beynəlxalq Bankının xarici öhdəliklərinin könüllü restrukturizasiyasının uğurla başa çatması nəticəsində müddəti 2019-cu ilə qədər nəzərdə tutulan 500 milyon ABŞ dolları həcmində avrobondların bankın balansından çıxarılmasını nəzərə alaraq, "Fitch" Beynəlxalq Reytinq Agentliyi onlara verdiyi reytinqləri geri çağırıb. Modern.az Azərbaycan Beynəlxalq Bankının mətbuat xidmətinə istinadən xəbər verir ki, restrukturizasiya planına əsasən, Bankın yeni buraxılan və müddəti 2024-cü ilə qədər müəyyənləşən istiqrazlarına isə hələlik reytinqlər verilməyib. Agentliyin rəyində qeyd edilir ki, restrukturizasiya prosesindən sonrakı dövrdə bankın kredit profili haqqında kifayət qədər məlumat əldə etdikdən sonra Fitch Azərbaycan Beynəlxalq Bankının həm qısamüddətli yerli və xarici valyutada olan reytinqinin (IDRs), həm də Dayanıqlıq Reytinqinin (Viability Rating) yüksələcəyini gözləyir.
Qeyd edək ki, Azərbaycan Beynəlxalq Bankının xarici öhdəliklərinin könüllü restrukturizasiyası prosesi 1 sentyabr 2017-ci il tarixində faktiki olaraq başa çatıb.
