Təhsil Nazirliyi orta məktəblərin 11-ci sinifləri üzrə buraxılış imtahanlarının cavablarını açıqlayıb. Təhsil Nazirliyindən Modern.az saytına bildirilib ki, imtahanların cavabları açıqlandığı gündən - iyunun 24-dən etibarən bir həftə ərzində apellyasiya komissiyası fəaliyyət göstərəcək.
İmtahanların nəticlərindən narazı qalan məzunlər bu müddət ərzində apellyasiya şikayəti verə bilərlər.
Buraxılış imtahanlarının cavabları Təhsil Nazirliyinin saytında - burada //exam.edu.gov.az/– yerləşdirilib.
Modern.az saytının məlumatına görə, 2-17 iyun aralığında respublikanın 60 şəhər və rayonunda ümumi orta təhsil (9-cu sinif) və tam orta təhsil (11-ci sinif) səviyyəsi üzrə mərkəzləşdirilmiş qaydada test üsulu ilə buraxılış imtahanları keçirilib.
11-ci sinifləri üzrə buraxılış imtahanları ana dili və ədəbiyyat, riyaziyyat, Azərbaycan tarixi, fizika, kimya, biologiya, coğrafiya və xarici dil fənlərindən aparılıb. 11-ci sinif şagirdləri ümumilikdə 120 suala cavab veriblər. İmtahan sualları fənlərə uyğun olaraq bu ardıcıllıqla sıralanmışdı: ana dili və ədəbiyyat - 1 - 25, riyaziyyat – 26 - 50, Azərbaycan tarixi – 51 - 65, fizika - 66 - 75, kimya - 76 - 85, biologiya - 86 - 95, coğrafiya – 96 - 105 və xarici dil - 106 - 120.
9-cu sinifləri üzrə buraxılış imtahanları isə ana dili və riyaziyyatdan keçirilmişdi. 50 sualın 25 - i ana dilinə qalan 25 - i isə riyaziyyat fənninə aid idi.
Hər bir fənn üzrə sualların 20% - dən 50% - nə qədər düz cavab verən şagird “3”, 50% - dən 80% - nə qədər düz cavab verən “4”, 80%-dən 100%-ə qədər düz cavab verən şagird isə “5” ilə qiymətləndirilib. Məsələn, 25 sualdan ən azı 5, ən çoxu 12 suala düz cavab verən şagird “3”, ən azı 13, ən çoxu 19 suala cavab verən şagird “4”, ən azı 20 və daha artıq suala düz cavab verən şagird “5” qiyməti alıb.
Orta məktəb məzunlarına attestat və şəhadətnamələr gələn həftədən etibarən veriləcək.
Şagird nailiyyətlərinin qiymətləndirilməsi prinsiplərinə uyğun olaraq, attestata yazılacaq yekun qiymət şagirdin fənn üzrə sınaq imtahanının nəticələri, X və XI siniflərin illik qiymətləri və buraxılış imtahanı qiymətləri əsasında hesablanacaq.
Şəhadətnaməyə yazılacaq yekun qiymət şagirdin fənn üzrə sınaq imtahanının nəticələri, VIII və IX siniflərin illik qiymətləri və buraxılış imtahanı qiymətləri əsasında hesablanacaq.
2010-2011-ci tədris ilində ölkəmizin ümumi təhsil məktəblərinin buraxılış (XI, XII) siniflərini 101521 şagird bitirib.
Modern.az
