Son illər miqrasiya sahəsindəki qanunvericiliyin təkmilləşdirilməsi və əmək miqrasiyası proseslərinə dövlət nəzarətinin gücləndirilməsi qeyri-qanuni əmək miqrasiyası hallarının ciddi surətdə azalması ilə nəticələnib.
Modern.az Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsinə istinadən bildirir ki, bu barədə Nazirlik yanında Dövlət Əmək Müfəttişliyi Xidmətinin rəisi vəzifəsini icra edən Rauf Tağıyev məlumat verib.
Hazırda ölkəmizdə 9147 nəfər əməkçi miqrantın yaşadığını deyən Rauf Tağıyev bildirib ki, Azərbaycanda davamlı xarakter alan iqtisadi tərəqqi prosesləri, çoxsaylı iş yerlərinin yaradılması, şəffaf və əlverişli biznes mühitinin təmin olunması, icimai siyasi sabitlik xarici ölkələrdən ölkəmizə əmək fəaliyyəti göstərmək üçün gələnlərin sayının artması ilə müşayiət olunur. Lakin müəyyən kateqoriya əcnəbi şəxslər də var ki, onlar burada əmək fəaliyyəti ilə məşğul olmalarına baxmayaraq, qanunvericiliyə əsasən əməkçi miqrant hesab edilmirlər.
Belə ki, milli qanunvericiliyə əsasən, işəgötürənlərin işə cəlb etdikləri əcnəbi şəxslər əməkçi miqrant hesab edilirlər.
“Ölkədə qeyri-qanuni əmək fəaliyyəti ilə məşğul olan əcnəbilərin bir qismi öz fəaliyyətlərini qanunvericiliyin tələblərinə uyğun leqallaşdırmış, bir çox əcnəbilərlə bağlı isə aidiyyəti dövlət orqanları tərəfindən müvafiq tədbirlər görülmüşdür. Bu istiqamətdə Dövlət Əmək Müfəttişliyi Xidməti öz səlahiyyətləri çərçivəsində zəruri tədbirlər həyata keçirməkdədir”.
Modern.az
