İyulun 3-də Belarusun paytaxtı Minskdə milli bayram – Respublika Günü münasibətilə hərbi parad keçirilib. Lukaşenko rejimindən narazı olan Belarus müxalifəti hərbi parad zamanı əks aksiya keçirməyə cəhd göstərib. Müxalifətçilər əvvəlcədən razılaşıblar ki, prezident Aleksandr Lukaşenkonun çıxışı zamanı əl çalıb səs salmaqla ona mane olsunlar. Amma Belarus milisi buna imkan verməyib.
Milis əvvəlcədən xəbərdarlıq edib ki, prezidentin çıxışı zamanı tərpənən şəxs cəzalandırılacaq. Xəbərdarlığa məhəl qoymayaraq prezident çıxış edən zaman əl çalanlar milis tərəfindən saxlanılıblar.
Belarus prezidenti Aleksandr Lukaşenko isə parada hərbi geyimdə gəlib. O, paradda çıxış edərək müxalifəti "qılınclayıb". Prezident deyib ki, ölkədə ictimai asayişi pozmaq istəyən qüvvələr var.
"Bizə "rəngli inqilabları" calamağa çalışırlar. Bu məqsədyönlü planlar başqa ölkələrin paytaxtlarında qurulur. Başa düşürük ki, bu hücumların məqsədi ölkədə həmrəyliyi pozmaq, bizə diz çökdürmək və müstəqilliyimizlə əldə etdiklərimizi heçə endirməkdir. Bu heç vaxt olmayacaq".
Minskin müxtəlif yerlərində gənclər tərəfindən səssiz aksiyalar da təşkil olunub. Milis belə aksiyalara da müdaxilə edib.
Modern.az “Lenta.ru”ya istinadən bildiri ki, müxalifətçilərin aksiyalarında 70-dək şəxs saxlanılıb. Saxlanılanlar arasında müxalifətyönlü “Naşa Niva” qəzetinin fotomüxbiri və “Evroradio”nun müxbiri də var.
Modern.az
