Maliyyə Bazarlarına Nəzarət Palatası (Palata) kredit İttifaqları və lizinq şirkətləri üçünDaşınar əmlakın yüklülüyünün dövlət reyestrinin (reyestr) iş mexanizmi və elektron portalının istifadəsi qaydaları üzrə təlim keçirilib.
Modern.az xəbər verir ki, sözügedən təşkilatların 50 nəfərdən çox nümayəndənin iştirak etdiyi təlimdə reyestrin əsas iş prinsipi, yüklülüyün növləri və yüklülük predmeti, reyestrin maliyyə xidmətlərinin istehlakçıları üçün faydası barədə məlumat verilib.
Reyestrin üstünlükləri barədə danışılarkən bildirilib ki, daşınar əmlakın rəsmi reyestrlərində qeydiyyata alınan daşınar əşyalar və dövlət qeydiyyatına alınmalı olan qiymətli kağızlar istisna olmaqla, yüklülük predmetini istənilən daşınar əmlak, habelə hüquqlar və tələblər, o cümlədən gələcəkdə yüklülük sahibinin mülkiyyətində olacaq daşınar əmlak təşkil edə bilər. Reyestr vasitəsilə kredit almaq imkanlarının genişlənməsi, daşınar əmlakların təminata cəlb edilməsinin stimullaşdırılması, hər növ daşınar əmlakın yüklülüyünün mümkün edilməsi həyata keçiriləcəkdir.
Təlimdə iştirak edən qonaqlar təmsil etdikləri təşkilatlardareyestrin istifadəsinin tətbiq edilməsi mərhələsində Palata ilə sıx əməkdaşlıq edəcəklərini bildiriblər.
Qeyd edək ki, Daşınar əmlakın yüklülüyünün dövlət reyestri Azərbaycan Respublikası Prezidentinin 2016-cı il 6 dekabr tarixli Fərmanı ilə təsdiq edilmiş “Azərbaycan Respublikasında kiçik və orta sahibkarlıq səviyyəsində istehlak mallarının istehsalına dair Strateji Yol Xəritəsi”nə müvafiq olaraq yaradılıb. “Daşınar əmlakın yüklülüyü haqqında” Azərbaycan Respublikasının 2 may 2017-ci il Qanunu ilə Reyestrin yaradılmasının hüquqi əsasları müəyyən edilib. Həmin Qanunun tətbiqi barədə Azərbaycan Respublikası Prezidentinin 24 may 2017-ci il Fərmanı ilə reyestrin aparılması Maliyyə Bazarlarına Nəzarət Palatasına tapşırılıb.
Media orqanları əlavə məlumat almaq üçün www.fimsa.az və [email protected] ünvanına müraciət edə bilərlər.
