Almaniyalı mütəxəssis Berti Foqts Azərbaycan milli komandasıyla müqavilənin uzadılıb-uzadılmaması məsələsinə münasibət bildirib.
Qol.az-ın məlumatına görə, Almaniyanın «Derwesten» nəşrinə müsahibəsində o deyib ki, AFFA-yla müqaviləsi gələn ilin yanvarında başa çatır. Foqts hələlik müqavilənin uzadılacağını bilmədiyini deyib: «Hələ ki, mənimlə bu haqda danışan olmayıb və deyəsən, danışmaq fikirləri də yoxdur».
Foqts azərbaycanlı futbolçuların beynəlxalq təcrübəsinin azlığından şikayətlənib: «Klublarda hazırlıq səviyyəsi aşağıdır».
Foqts xaricdə çıxış edən azərbaycanlı futbolçuların sayının çox az olduğunu deyib: «Bu, Azərbaycan üçün problemdir. Futbolçular ölkələrində digər vətəndaşlarla müqayisədə yaxşı qazandığından başqa yerə getmək istəmirlər. Mən futbolçulara öz layiqli işlərinə görə pul verilməsini istəyirəm, amma bunun qarşısını alanlar çoxdur».
Modern.az
