5 oktyabr Beynəlxalq müəllimlər günüdür. Bu tarixin qeyd edilməsinə dair qərarı ilk dəfə 1966-cı il oktyabrın 5-də YUNESKO verib. Həmin vaxt bu təşkilat tərəfindən müəllimlərin statusunun artırılması ilə bağlı tövsiyə xarakterli sənəd qəbul edilib. İndi dünyanın 100-dən çox ölkəsində oktyabrın 5-i müəllimlərin peşə bayramı günü kimi qeyd edir.
Təhsil Nazirliyindən Modern.az-a verilən məlumata görə, hazırda Azərbaycanda ümumtəhsil məktəblərində 159 min müəllim çalışır.
2003-2010-cu illərdə təhsilin inkişafındakı xidmətlərinə görə 1000-dən çox təhsil işçisi yüksək dövlət təltiflərinə, fəxri adlara və fərdi təqaüdlərə layiq görülüb.
Son 4 ildə "Ən yaxşı müəllim" müsabiqəsinin qalibi olmuş 400 müəllimin hər birinə 5000 manat məbləğində birdəfəlik pul mükafatı verilib.
"Xalq kompüteri" layihəsi çərçivəsində 9000 müəllim kompüterlə təmin olunub.
Son illər inzibati, pedaqoji və texniki heyət əhatə olunmaqla 54 min nəfər müvafiq treninqlərdən keçərək İKT bacarıqlarına yiyələnib.
Modern.az
