GUAM-ın beynəlxalq təşkilat olaraq bütün münaqişələrə universal yanaşması var. Bu, həm Dağlıq Qarabağ, həm Osetiya və Abxaziya, həm də Dnestryanı münaqişələrə aiddir. GUAM-ın “dondurulmuş” münaqişələrin həlli və sülhün təmin olunması ilə bağlı bəyannamə layihəsi var. Bu bəyannamənin BMT-də qəbulu üçün birgə səylər göstərilir”.
APA-nın xəbərinə görə, bu sözləri jurnalistlərə açıqlamasında GUAM-ın baş katibi Valeri Çeçelaşvili deyib. O bildirib ki, GUAM çərçivəsində bir çox istiqamətdə işlər aparılır: “Varşavada nazirlər səviyyəsində keçirilən görüşdə iş planı təsdiq olundu və ona uyğun iş aparılır. Bu istiqamətlərdən biri GUAM ərazisində sərbəst ticarət zonasının inkişaf etdirilməsi, mütəşəkkil cinayətkarlıqla mübarizə - kriptoqrafik müdafiə sisteminin qurulması, turizmin inkişaf etdirilməsi, yapon tərəfdaşlarımızla işlərin digər bazarlara çıxarılması, GUAM nəqliyyat dəhlizi konsepsiyasının təsdiqlənməsi, enerji resurslarının daşınması və s. məsələlər var. Bu həftə katiblikdə iki işçi alt qrupun iclası keçiriləcək. Noyabrda iqtisadiyyat və ticarət üzrə alt qrupun iclası keçiriləcək. Turizm rəhbərlərinin iştirakı ilə görüş, nanotexnologiya üzrə videokonfrans təşkil olunacaq”.
Modern.az
