Hesablama Palatası tərəfindən nəzarət tədbirlərinin nəticələrinə uyğun olaraq yoxlanılan qurumlara, onların tabe olduqları nazirlik, komitə və baş idarələrə, habelə digər əlaqədar orqanlara 2008-ci ildə 41, 2009-cu ildə 57 və 2010-cu ildə isə 83 təqdimat göndərilib. Palata yalnız nöqsan, çatışmazlıq və maliyyə pozuntularının aşkar edilməsi ilə kifayətlənməyib, onların aradan qaldırılması, artıq və əsassız ödənilmiş büdcə vəsaitlərinin bərpa edilməsi, günahkar şəxslərin müvafiq qaydada cəzalandırılması üçün müvafiq tədbirlər həyata keçirib. Modern.az-ın xəbərinə görə, bu barədə Hesablama Palatasının sədri Heydər Əsədov məlumat verib.
H.Əsədov deyib ki, Hesablama Palatası son üç ildə milyonlarla manat məbləğində büdcə vəsaitlərinin nağd qaydada müvafiq hesablara bərpa edilməsinə, dövlət büdcəsinə və Dövlət Sosial Müdafiə Fondunun büdcəsinə ödənilməsinə, habelə böyük həcmlərdə iş və xidmət, inventar və avadanlıq şəklində bərpasına nail olub:
“Yəni keyfiyyətsiz və ya müqavilədə nəzərdə tutulduğundan az yerinə yetirilmə müqabilində əlavə iş və xidmətlərin görülməsini, müqavilədə nəzərdə tutulduğundan az verilmə müqabilində çatışmayan inventar və avadanlıqların, dərman vasitələrinin büdcə təşkilatlarına təhvil verilməsini, habelə böyük məbləğlərdə debitor və kreditor borcların uçota götürülməsini, lüzumsuz kreditor borcların ləğv edilməsini, dövlət büdcəsinə ödəniləcək vergi və digər icbari ödənişlər üzrə vəsaitlərin hesablanmasını, dövlət büdcəsinə artıq ödəmə kimi qeydə alınmış vəsaitlərin ləğv olunmasını təmin etmişdir”.
H.Əsədovun sözlərinə görə, Hesablama Palatasının nəzarət tədbirləri nəticəsində çoxlu sayda ştat vahidi və qruplar ləğv edilib, zəruri ştat vahidi üzrə əvəzləşdirmə aparılıb, çarpayı fondunun sayı azaldılıb, başqa sözlə gələcəkdə büdcə vəsaitlərinin əsassız xərclənməsinə səbəb olacaq ödənişlərin qarşısı nəzarət tədbirləri ilə əvvəlcədən alınıb.
Heydər Əsədov deyib ki, Həyata keçirilən nəzarət tədbirləri zamanı bir sıra ciddi nöqsan və çatışmazlıqlara yol verilməklə dövlətə külli miqdarda zərər vurulması nəzərə alınaraq 4 yoxlama materialları müvafiq qaydada araşdırılmaq üçün Baş Prokurorluğu göndərilib, habelə dövlət büdcəsinə külli miqdarda borcu olan vergi ödəyicilərindən 11 vergi ödəyicisi barədə Vergilər Nazirliyi tərəfindən cinayət işinə başlanılıb, nöqsan və çatışmazlıqlara yol verən yüzlərlə məsul şəxs barəsində aidiyyəti orqanlar tərəfindən ciddi intizam tənbehi tədbirlərinin görülməsinə nail olunub.
Palata sədri bildirib ki, görülən tədbirlər hesabına milyonlarla manat məbləğində artıq və əsassız ödənişlərin və səmərəsiz xərclərin qarşısı alınıb, dövlət vəsaitlərinin qanunvericiliyin tələblərinə uyğun istifadəsi və ya müvafiq qaydada uçota götürülməsi təmin edilib ki, onların ümumi məbləği Hesablama Palatasının saxlanılmasına sərf edilmiş büdcə vəsaitləri ilə müqayisədə dəfələrlə çoxdur.
H.Əsədov xüsusi vurğulayıb ki, hazırda nəzarət orqanları tərəfindən həyata keçirilən yoxlamalar büdcədən maliyyələşən təşkilatların çox az hissəsini əhatə edir. Bu isə yoxlama aparılmayan təşkilatlarda maliyyə intizamının pozulması riskini artırır, büdcə vəsaitlərinin təyinatından kənar və səmərəsiz xərc olunmasını istisna etmir. Bütün bunlar nəzarət tədbirlərinin sayının əhəmiyyətli dərəcədə artırılmasını və bu zaman daha çox funksional fəaliyyətin bütövlükdə əhatə olunmasını şərtləndirir ki, Palata bu istiqamətdə öz fəaliyyətini daha da gücləndirib.
“Palatanın fəaliyyətində aşkarlığın, şəffaflığın və hesabatlılığın təmin edilməsi Palatanın cari fəaliyyətinin əsas prinsiplərindən birini təşkil etmiş və bu istiqamətdə fəaliyyət qabaqcıl beynəlxalq təcrübəyə və qüvvədə olan qanunvericilik aktlarının tələblərinə uyğun olaraq tənzimlənmişdir”-deyə H.Əsədov qeyd edib.
O, bildirib ki, Hesablama Palatası bu gün büdcə idarəçiliyində, icra hakimiyyəti orqanlarının fəaliyyətində şəffaflığın və səmərəliliyin təmin edilməsi sahəsində mühüm rol oynayan dövlət qurumu kimi çıxış edir.
Qeyd edək ki, noyabr ayının 2-3-də Azərbaycan Respublikası Hesablama Palatasının fəaliyyətə başlamasının 10 illik yubileyi qeyd olunur. Yubiley münasibəti ilə noyabrın 2-də Palatada Azərbaycan Milli Məclisinin, bir sıra mərkəzi icra hakimiyyəti orqanlarının, beynəlxalq təşkilatların və xarici dövlətlərin Ali Audit Qurumlarının rəhbərləri və nümayəndələrinin iştirakı ilə təntənəli iclas keçirilib.
Rusiya Hesablama Palatasının sədri Sergey Stepaşinin, Türkiyə Hesablama Məhkəməsinin sədri Recai Akyelin, Qazaxıstanın Respublika Büdcəsinin İcrasına Nəzarət üzrə Hesablama Komitəsinin sədri Omarxan Oksikbayevin, Moldova Hesablama Məhkəməsinin sədri Serafim Urecheanın, Ukrayna Hesablama Palatasının sədr əvəzi Oleksandr Yaremenkonun və Qırğızıstan Hesablama Palatasının Auditoru Utkomxan Abdullayevanın rəhbərlik etdikləri nümayəndə heyətləri, Avropa İttifaqının Azərbaycandakı Nümayəndəliyinin Rəhbəri Səfir Roland Kobia və Dünya Bankının Azərbaycandakı Nümayəndəliyinin Rəhbəri Cozef Ouen, habelə Milli Məclisi sədrinin birinci müavini Ziyafət Əsgərov, Milli Məclisin İqtisadi siyasət komitəsinin sədri Ziyad Səmədzadə, Milli Məclisin Aqrar siyasət komitəsinin sədri Eldar İbrahimov, Milli Məclisin Regional məsələlər komitəsinin sədr müavini Fəttah Heydərov, Milli Məclisin İİntizam Komissiyasının sədri Siyavuş Novruzov, maliyyə naziri Samir Şərifov, iqtisadi inkişaf naziri Şahin Mustafayev, vergilər naziri Fazil Məmmədov, Dövlət Gömrük Komitəsinin sədri Aydın Əliyev, Dövlət Sosial Müdafiə Fondunun sədri Səlim Müslümov, Dövlət Neft Fondunun icraçı direktoru Şahmar Mövsümov və Auditorlar Palatasının sədri Vahid Novruzov tədbirdəki qonaqlar arasında olub.
Təntənəli iclasda Hesablama Palatasının fəaliyyətinə həsr olunmuş film nümayiş etdirilib, Palatanın fəaliyyətində xüsusi xidmətlərinə görə Azərbaycan Respublikasının Prezidenti İlham Əliyevin sərəncamı ilə Hesablama Palatasının Sədri Heydər Əsədova 2-ci dərəcəli "Vətənə xidmətə görə" ordeni, Palata üzvlərinə "Tərəqqi" medalı, Palatanın bir qrup əməkdaşına isə "Dövlət qulluğunda fərqlənməyə görə" medalı təqdim edilib.
Modern.az
