Prezident İlham Əliyev Qəbələ şəhərinə səfər edib. Modern.az xəbər verir ki, səfər zamanı Prezident Qəbələ şəhər məscidinin yeni binasının tikinti işləri ilə tanış olub. Məscidin axundu dövlət başçısına müqəddəs Qurani-Kərim hədiyyə edib. Prezident məscidin gələcək görüntülərini əks etdirən fotostendə baxıb. Məlumat verilib ki, Qəbələ şəhər məscidinin əvvəlki kiçik binası son dövrdə tamamilə yararsız vəziyyətdə olub.
Prezident İlham Əliyev tikinti işlərinin milli xüsusiyyətlər nəzərə alınmaqla aparılmasına dair tapşırıqlarını verib.
Prezident İlham Əliyev Qəbələ rayonuna səfəri çərçivəsində “Qafqaz Sport Hotel”in açılışında da iştirak edib. Dövlət başçısı otelin rəmzi açılışını bildirən lenti kəsib və turizm obyekti ilə yaxından tanış olub.
İlham Əliyev Qəbələ Rayon İcra Hakimiyyətinin yeni inzibati binasının açılışında iştirak edib. Prezident binanın idarəetmə məntəqəsi ilə tanış olub. Buradan rayon ərazisinə nəzarət etmək mümkündür. Fövqəladə hal baş verdiyi təqdirdə eyni anda rayonun Vəndam, Bum və Nic qəsəbələri ilə birbaşa videokonfranslar keçirmək imkanları var.
Dövlət başçısı görülən işlərdən razı qaldığını bildirib, tapşırıq və tövsiyələrini verib.
Prezident İlham Əliyev noyabrın Qəbələ Beynəlxalq Aeroportunun açılış mərasimində iştirak edib. Prezident mərasimdə çıxış edib. Daha sonra dövlət başçısı aeroportun rəmzi açılışını bildirən lenti kəsib.
“Azərbaycan Hava Yolları” QSC-nin prezidenti Cahangir Əsgərov beynəlxalq standartlara cavab verən Qəbələ aeroportu haqqında Prezident İlham Əliyevə məlumat verib.
Prezident İlham Əliyev Qəbələ rayonunda Qarabağ müharibəsi əlilləri və şəhid ailələri üçün tikilmiş 36 mənzilli binanın istifadəyə verilməsi mərasimində iştirak edib. Prezident mənzillərdə yaradılan şəraitlə tanış olub.
Prezident Qarabağ müharibəsi əlilləri və şəhid ailələri ilə görüşüb, yeni mənzillərin orderlərini və avtomobillərin açarlarını sahiblərinə təqdim edib.
Sonda xatirə şəkli çəkdirilib.
Prezident İlham Əliyev Qəbələdə su-limonad istehsalı zavodunun açılışında iştirak edib. Prezident İlham Əliyev zavodu işə salıb.
Prezident İlham Əliyevin respublikamızın şimal-qərb bölgəsinə səfəri başa çatıb.
Dövlət başçısı yeni istifadəyə verilən Qəbələ Beynəlxalq Aeroportundan Bakıya qayıdıb.
Modern.az
