Göyçay şəhərinin su təchizatı və kanalizasiya sisteminin yenidən qurulması layihəsi üzrə keçirilən beynəlxalq tenderə yekun vurulub. 7 şirkətin qatıldığı müsabiqənin nəticələrinə görə Türkiyənin “ATİNAK” şirkəti daha sərfəli şərtlər təklif edərək tenderin qalibi olub və həmin şirkətlə “Azərsu” ASC arasında müqavilə imzalanıb. Layihə çərçivəsində Göyçay şəhərində tikintisinə başlanmış suqəbuledici qurğular kompleksinin inşası başa çatdırılacaq, şəhərin içməli su və kanalizasiya şəbəkələri yenidən qurulacaq.
Bu barədə Modern.az-a “Azərsu” ASC-nin Mətbuat xidməti və ictimaiyyətlə əlaqələr şöbəsindən məlumat verilib.
Asiya İnkişaf Bankının krediti hesabına reallaşdırılacaq işlərə 2011-ci ilin dekabrında başlanacaq və tikintinin 18 ay müddətinə tamamlanması nəzərdə tutulur.
Qeyd edək ki, Ağdaş və Göyçay şəhərlərinin su təchizatı və kanalizasiya sistemlərinin yenidən qurulması Asiya İnkişaf Bankı ilə birlikdə “Şəhər su təchizatı və kanalizasiya layihəsi” və “Su təchizatı və kanalizasiya investisiya proqramı” çərçivəsində həyata keçirilir. 2010-cu ildə icrası başa çatmış “Şəhər su təchizatı və kanalizasiya layihəsi”nə uyğun olaraq “Göyçay Sukanal” Törəmə Açıq Səhmdar Cəmiyyəti (TASC) üçün zəruri maşın və mexanizmlər alınıb, şəhərin su təchizatının yaxşılaşdırılması məqsədilə 3 subartezian quyu qazılıb, sugötürücü kamera və xlorator binası daxil olmaqla həcmi 2500 kubmetr olan yeni su anbarı inşa edilib. Eyni zamanda yeni laboratoriya binası, nasos stansiyası tikilmiş, nasosların normal iş rejiminin təmin edilməsi üçün yeni elektrik xətləri çəkilib.
Bununla yanaşı “Göyçay Sukanal” TASC üçün yeni ofis binası və istehsalat bazası inşa edilib.
Modern.az
