Modern.az saytı xəbər verir ki, Milli Məclisin bu gün keçirilən plenar iclasında maliyyə naziri Samir Şərifov Azərbaycan Respublikasının 2012-ci il üçün büdcə zərfinə daxil olan sənədlərin müzakirəsi zamanı deputatların səsləndirdiyi təkliflərə münasibət bildirib.
Nazir deyib ki, büdcədən Qeyri-Hökumət Təşkilatlarına Dövlət Dəstəyi Şurasına ayrılan vəsaitin artırılması ilə bağlı təklif nəzərə alınıb. Qərara alınıb ki, 2012-ci il dövlət büdcəsindən Prezident yanında Qeyri-Hökumət Təşkilatlarına Dövlət Dəstəyi Şurası üçün əvvəlcədən nəzərdə tutulan maliyyə vasaiti əlavə olaraq 1 milyon manat artırılsın.
Beləliklə, 2012-ci ildə dövlət büdcəsindən QHT-lərə Dövlət Dəstəyi Şurasına 2 milyon 808 min 960 manat deyil, 3 milyon milyon 808 min 960 manat vəsait ayrılacaq. Bu vəsait ölkədə vətəndaş cəmiyyətinin formalaşdırılması prosesinin inkişafı istiqamətində milli qeyri-hökumət təşkilatlarının daha səmərəli iştirakını təmin etmək, həmçinin qeyri-hökumət təşkilatlarına dövlət qayğısını gücləndirmək məqsədi daşıyır.
Müqayisə üçün bildirək ki, 2011-ci ildə Qeyri-Hökumət Təşkilatlarına Dövlət Dəstəyi Şurasına büdcədən 2 milyon 766 min 324 manat vəsait ayrılmışdı.
Modern.az
