Daxili İşlər Nazirliyinin Baş Dövlət Yol Polisi İdarəsi ötən gün Sumqayıtda baş verən qəza ilə bağlı məlumat yayıb.
Baş DYP İdarəsinin şöbə rəisi Rüfət Quliyev Modern.az-a bildirib ki, 21 fevral, saat 17:00 radələrində Sumqayıt şəhəri, Məşədi Əzizbəyov və Nizami küçələrin kəsişməsində “Toyota Prado” markalı, 10-BN-023 dövlət qeydiyyat nişanlı avtomobil 30 saylı marşrut xətti üzrə hərəkətdə olan “AKİA” markalı, 50-AE-676 dövlət qeydiyyat nişanlı avtobusla toqquşub. Və nəticədə avtobus yoldan çıxaraq yaşayış binasının divarına dəyib”.
“Sumqayıt şəhər Təcili Tibbi Yardım Xidmətindən verilən məlumata əsasən, xəstəxanaya aparılan 31 nəfər sərnişindən 13-də xəsarət olmadığı üçün onlar evə buraxılıb, 6 nəfər reanimasiyaya yerləşdirilib, 12 nəfəri isə stasionara qəbul olunub”-deyə R.Quliyev qeyd edib.
Bu gün isə reanimasiya şöbəsində olan xəstələr artıq palatalara köçürülüb, palatada müalicə alan 12 nəfərdən 11-nin isə gün ərzində evə buraxılacaqları gözlənilir.
