Nazirlər Kabineti tərəfindən təsdiq edilmiş “Bakının tarixi mərkəzinin konservasiyası üzrə ətraflı Baş Plan”a əsasən İçərişəhərdə yerləşən Ağa Mikayıl hamamında aparılmış bərpa işləri başa çatıb.
XVIII əsrdə Şamaxı sakini Ağa Mikayıl tərəfindən tikdirilmiş və xalq etimalogiyasında “Hamamçılar məhəlləsi” adlanan ərazidə yerləşən Ağa Mikayıl hamamı qabaqcıl texnologiyaların köməyi ilə yerli və xarici mütəxəssislər tərəfindən bərpa edilib. Abidənin sütunları möhkəmləndirilib, daxilində təmir-bərpa işləri aparılmış, fasadı tarixi görkəminə qaytarıləb. Bu barədə Modern.az-a Nazirlər Kabineti yanında “İçərişəhər” Dövlət Tarix-Memarlıq Qoruğu İdarəsindən məlumat verilib.
Məşhur “O olmasın, bu olsun” filminin bəzi epizodları burada çəkildiyi üçün bəzən Məşədi İbad hamamı adlanan abidənin gələcəkdə öz təyinatı üzrə istifadə olunacağı nəzərdə tutulur. Bu səbəbdən Ağa Mikayıl hamamının daxilində ənənəvi abu-hava yaradılıb və müasir avadanlıqlarla təchiz olunub. Abidə öz fəaliyyəti ilə İçərişəhərə gələn turistlərə şərq mədəniyyətinin ayrılmaz atributlarından olan hamam mədəniyyəti ilə tanış edəcək və əhaliyə xidmət edəcək.
İçərişəhərdə mədəni irsimizin bir hissəsi olan tarixi abidələrin qorunması və gələcək nəsillərə çatdırılması üçün bərpa və konservasiya işləri həyata keçirilir. Ötən ilin dekabr ayında İçərişəhərin ən qədim məscidi olan Məhəmməd Məscidində xarici mütəxəssislər tərəfindən Azərbaycanda ilk dəfə olaraq vakuum yolu ilə bərkidilmə üsulundan istifadə etməklə muzey konservasiyası işləri görülüb. Gələcəkdə də İçəri Şəhərdə bu silsilədən olan işlərin aparılması nəzərdə tutulu.
Modern.az
