Azərbaycandakı qadın QHT-ləri bəyanat verdilər - SİYAHI

Təhsil

13 Fevral 2012, 22:15

Azərbaycanda fəaliyyət göstərən qadın QHT-ləri “Eurovision – 2012” Beynəlxalq Mahnı Müsabiqəsinin Bakıda keçirilməsinə “yox” deyənlərə etiraz əlaməti olaraq bəyanatla çıxış edib. Modern.az-a daxil olan mütaciətdə deyilir:

- Qloballaşan dünyada qərbə inteqrasiya edən, hüquqi dövlət və vətəndaş cəmiyyəti quruculuğu yolunu tutan Azərbaycan iqtisadi inkişaf tempinə görə regionda lider dövlətə çevrilmişdir. Abadlaşan şəhər və kəndlərimiz buna bariz nümunədir. Təəssüf hissi ilə qeyd etməliyik ki, Azərbaycanın iqtisadi yüksəlişi, o cümlədən müstəqil xarici siyasət yürütməsi dostlarımızı sevindirsə də, hələ də aramızda bütün bu reallığı inkar edənlər, görmək istəməyənlər mövcuddur.

Belə ki, son zamanlar Azərbaycan xalqına və dövlətinə qarşı düşünülmüş ardıcıl çıxışlar, beynəlxalq aləmdə ölkənin imicinə xələl gətirmək məqsədi daşıyan böhtan xarakterli bəyanatlar, həqiqətə söykənməyən yalan məlumat və məntiqsiz davranışlar obyektivlikdən çox-çox uzaqdır. 2011-ci il “Eurovision” Mahnı Müsabiqəsində qalib gələn Azərbaycan bütün dünyada böyük nüfuza sahib oldu və “Eurovision - 2012” Beynəlxalq Mahnı Müsabiqəsinə ev sahibliyi etmək səlahiyyəti qazandı.

Bu yarışmanın ölkəmizdə keçirilməsi böyük siyasi və mədəni əhəmiyyətə malikdir. Azərbaycanın Dağlıq Qarabağ kimi çox ağır bir problemi vardır və bu yarışma ölkəmizdə əldə olunan inkişafın, tariximizin və mədəniyyətimizin dünyaya təqdim olunması, reklamı üçün bir vasitədir. “Eurovision - 2012” Mahnı Müsabiqəsinin yüksək səviyyədə keçirilməsi məqsədilə respublikanın bütün dövlət və demokratik institutları birləşərək, geniş miqyaslı hazırlıq işləri aparırlar. Bu tək dövlətin deyil, bütün cəmiyyətin, bütün vətəndaşlarımızın milli təqdimat məsələsidir.

Lakin özünü sülh, hüquq müdafiəçisi və demokratiya carçısı adlandıran bir neçə qeyri-hökumət təşkilatı “Eurovision - 2012” Mahnı Müsabiqəsinin Bakıda keçirilməsinin əleyhinə Avropa miqyasında əks-təbliğat aparır və bu məqsədlə xüsusi kampaniyalar təsis edərək, xarici dövlətləri və beynəlxalq təşkilatları məntiqdən uzaq olan bu aksiyaya qoşulmağa səsləyirlər. Onlar unudurlar ki, “Eurovision” siyasi deyil, mədəni tədbirdir. Bu tədbirdən siyasi ambisiyalar üçün istifadə etmək Azərbaycan vətəndaşına yaraşmayan bir davranışdır.

Biz, aşağıda imza atan Azərbaycanın qadın QHT-ləri, bu kimi halları pisləyir və bir qrup “demokratın” öz siyasi ambisiyaları üçün beynəlxalq mahnı müsabiqəsindən istifadə etməsinə etiraz səsimizi ucaldırıq. Biz onları beynəlxalq TV-lərdə və beynəlxalq təşkilatlarda işğal altında olan vətən torpaqlarımız, bir milyon məcburi köçkün və qaçqının hüquqları, Xocalı soyqırımı, əsir və girovluqda olan qız, gəlin, qadın və uşaqlarımızın naməlum taleyi haqqında məsələ qaldırmağa, ümummilli problemlərə biganə qalmamağa çağırırıq.

Gəlin, hamılıqla 2012-ci il “Eurovision” Mahnı Müsabiqəsi zamanı modernləşən Bakımızda milli, mədəni və mənəvi dəyərlərimizin layiqli təqdimatı üçün çalışaq. Tolerant millət və dövlət olmağımızı, digər xalqlara və mədəniyyətlərə qarşı həssas və qayğı ilə yanaşmağımızı göstərək, bütün hadisələrin obyektiv işıqlandırılmasına və adekvat şərh olunmasına şərait yaradaq, mədəniyyətlərarası və sivilizasiyalararası dialoq üçün ölkəmizdə real imkan və mexanizmlər olduğunu bütün dünyaya nümayiş etdirək.