Azərbaycan Dillər Universitetinin rektoru, millət vəkili, professor Səməd Seyidov rəhbərlik etdiyi universitetin yerli koordinatoru olduğu Erasmus Mundus mübadilə proqramı çərçivəsində Alrakis layihəsinin tələbə mobilliyində iştirak edən tələbələrlə görüşdü. ADU-nun Beynəlxalq əlaqələr üzrə prorektoru, professor, əməkdar müəllim Jalə Qəribova görüşün məqsədinin proqramın tələbə mobilliyinə müraciət edən tələbələrlə görüşmək və proqramın yerli koordinatorluğunun rəhbəri ilə tanışlıq xarakteri daşıdığını bildirdi.
Rəhbərlik etdiyi ali təhsil ocağının bir sıra beynəlxalq təhsil proqramlarında aktiv iştirak etdiyini deyən S.Seyidov Azərbaycanda fəaliyyət göstərən müxtəlif ali təhsil müəssisələrinin tələbələrinin Erasmus Mundus proqramında iştirak etmək niyyətinin sevindirici hal olduğunu qeyd etdi. Bəzi çatışmayan cəhətlərin olduğunu bildirən S. Seyidov qonşu ölkələr olan Gürcüstan və Ermənistandan daha çox tələbənin bu proqramda iştirak etdiyini vurğuladı. Gürcüstanın bu proqrama 138 nəfərlə qatıldığına toxunan rektor Ermənistanda bu göstəricinin 90, Azərbaycandan isə 70 tələbənin olduğunu söylədi.
O, Cənubi Qafqazda Azərbaycanın iqtisadi və digər parametrlərə görə qonşu ölkələrdən öndə olduğunu bildirdi. ADU-nun rektoru Azərbaycanın iştirak göstəricisinin rəqəmlərdə də yüksək şəkildə əks olunmalı olduğunu vurğuladı. O, iştirak səviyyəsinin aşağı olmasını ölkəmizin Erasmus Mundus proqramına daha gec qoşulması ilə əlaqələndirdi. S. Seyidov universitet olaraq ötən ildən bu proqramda iştirak etdiklərini tələbələrin diqqətinə çatdırdı. Növbəti illərdə ölkəmizin sözügedən proqrama daha çox iştirakçı ilə qatılacağına əminliyini ifadə edən rektor göstəricinin yalnız kəmiyyətdə deyil, keyfiyyətdə də əks olunacağına ümidvar olduğunu dedi. Proqramda Azərbaycan gənclərinin iştirakını müsbət xarakterizə edən S. Seyidov gələcəkdə onların növbəti iştirakçılara dəstək verəcəyini söylədi.
O, fərdi uğurları kollektiv qalibiyyətə çevirməyin zəruriliyini önə çəkdi. Rektor Erasmus Mundus proqramının gənclərə Avropanın aparıcı universitetlərində təhsil imkanları yaratdığını nəzərə çatdırdı. ADU-nun rektoru tələbələrlə görüşündə ölkəmizin Avropa məkanına sürətlə inteqrasiya etdiyinə də toxundu. “Bu özünü xüsusilə təhsil sahəsində göstərir”-deyə S. Seyidov vurğuladı. Rektor proqramın gənclər üçün daim inkişaf meylləri yaratdığını və onlara bu imkanlardan bəhrələnməyi tövsiyə etdi. S. Seyidov bildirdi ki, Erasmus Mundus proqramının digər proqramlardan üstünlüyü adıçəkilən proqramda tələbələr üçün geniş təhsil imkanlarının mövcud olmasındadır.
