Baş prokuror yanında Korrupsiyaya qarşı Mübarizə İdarəsinə Səhiyyə Nazirliyinin Bakı Baş Səhiyyə İdarəsinin 14 saylı Birləşmiş Şəhər Xəstəxanasının baş həkimi və Əmək və Əhalinin Sosial Müdafiəsi Nazirliyinin 9 saylı Tibbi Sosial Ekspert Komissiyasının sədrinin qanunsuz əməlləri barədə daxil olan əməliyyat məlumatları araşdırılıb. Bu barədə Modern.az-a Baş Prakurorluğun mətbuat xidməti məlumat verib. Prakurorluqdan bildirilib ki, Bakı şəhər sakinindən Tibbi Sosial Ekspert Komissiyasına göndərişin verilməsi üçün 14 saylı Birləşmiş Şəhər Xəstəxanasının baş həkimi və əlillik dərəcəsinin təyin olunması üçün 9 saylı Tibbi Sosial Ekspert Komissiyasının sədri rüşvət tələb ediblər. Təxirəsalınmaz istintaq-əməliyyat tədbirlərinin keçirilməsi üçün Korrupsiyaya qarşı mübarizə idarəsində dərhal istintaq-əməliyyat qrupu yaradılıb. 3 may 2012-ci il tarixdə keçirilən istintaq-əməliyyat tədbirləri nəticəsində 14 saylı Birləşmiş Şəhər Xəstəxanasının baş həkimi Salamov Oktay İsgəndər oğlu Tibbi Sosial Ekspert Komissiyasına 88 nömrəli göndərişin verilməsi üçün xəstəxananın Buzovna qəsəbəsində yerləşən inzibati binasındakı xidməti otağında Bakı şəhər sakinindən 3 min manat məbləğində pulu rüşvət kimi alarkən cinayət başında yaxalanıb.
Həyata keçirilən digər istintaq-əməliyyat tədbirləri nəticəsində 9 saylı Tibbi Sosial Ekspert Komissiyasının sədri Xudaverdiyev Bayram Rafil oğlu xidməti otağında əlillik dərəcəsinin təyin edilməsi üçün komissiyanın Mərdəkan qəsəbəsində yerləşən inzibati binasında Bakı şəhər sakinindən 3 min manat məbləğində pulu rüşvət kimi alarkən cinayət başında yaxalanıb.
Oktay Salamovun xidməti otağına baxış keçirilərkən qəzetə bükülən 30 ədəd 100 manatlıq əskinazlarla - cəmi 3 min manat məbləğində pul və vətəndaşın adı qeyd olunub qeydiyyat kitabçası maddi sübut kimi götürülüb.
Bayram Xudaverdiyevin xidməti otağına və üzərinə baxış keçirilərkən əynindəki pencəyin cibindən qəzetə bükülmüş 30 ədəd 100 manatlıq əskinazlarla - cəmi 3 min manat olan bağlama, həmçinin komissiyanın qeydiyyat otağına keçirilən baxış zamanı vətəndaşın şəxsiyyət vəsiqəsinin surəti və yaşayış yeri haqqında arayış aşkar edilərək götürülüb.
Həmin faktlara görə Cinayət Məcəlləsinin 311.1-ci (rüşvət alma) maddəsi ilə cinayət işi başlanmış və törətdikləri cinayət əməllərinə görə Oktay Salamov və Bayram Xudaverdiyev qeyd edilən maddə ilə ittiham olunaraq məhkəmənin müvafiq qərarları ilə barələrində həbs qətimkan tədbiri seçilib.
Hazırda cinayətin digər iştirakçılarının müəyyən edilməsi istiqamətində təxirəsalınmaz istintaq-əməliyyat tədbirlər davam etdirilir.
Modern.az
