Bakı Dövlət Universitetinin Jurnalistika fakültəsinə yeni dekanı Şamil Vəliyev fakültədə hazırda görülən işlər, edilən yeniliklər barəsində Modern.az-a danışıb.
“Bu müddət üçün onu deyə bilərəm ki, artıq iş prosesinə tam uyğunlaşma gedir. Semestr başa çatır, semestr yekunları ilə bağlı tələbələrin xeyli, müxtəlif səpgili problemləri var. Onların hər birinin problemini dinləmək, cavab vermək xüsusi məsuliyyət, səbr tələb edir. Amma işini bilən, işin içində olan üçün heç nə çətin deyil. Semestr yekunları, imtahanları ilə bağlı qayğılarımız var. İmtahan biletlərinin hazırlanması, məşğələ saatlarının keçirilməsi prosesi davam edir. Eyni zamanda, dəvətlər alırıq. Dünən Belarusdan dəvət almışıq, orada iştirak etmək lazımdır. Beynəlxalq simpozium, elmi konfrans keçiriləcək. Biz də çalışırıq ki, orada iştirak edək”.
Heç bir çətinliyin olmadığını deyən dekan hələki işin qaydasında getdiyini bildirib.
“Tədris, elmi, təşkilatı işlərimiz öz axarı ilə gedir, hələki problemimiz,çətinliyimiz yoxdur. Hətta bu arada tələbələrimiz futbol yarışında iştirak ediblər. Üçüncü yer də olsa, fakültəyə kubok gətiriblər”.
Dekan bildirib ki, fakültəni hələ qarşıda çox böyük uğurlar gözləyir. “Təbii ki qarşıda görüləcək işlərimiz çoxdur. Tələbələrimizin reytinq cədvəlində birinci yerdə durması mənim üçün böyük bir sevincdir. Çünki mən tələblərimlə nəfəs alıram. Mənim dekan gəlməyimi də tələbələr, müəllimlər, kollektiv çox böyük rəğbətlə qarşıladı. Buna görə, işləməyə dəyər. Fakültədə yeni yaradılacaq studiya ilə bağlı hələki bir xəbər yoxdur. Semestr işlərinə baş qarışıb, amma müfaviq bir vaxtda bu işlə də məşğul olacağıq. Fakültədə yeni internet TV yaradılacaq. Bunun üçün rektorluq da xüsusi bir otaq ayırıb.Yeni avadanlıqların alınma prosesi gedir. Bu layihə İnternet Forumunun rəhbəri Osman Gündüz və bizim fakültəylə müştərək hazırlanır. Buraya həm bizim, həm də digər universitet tələbələri də cəlb olunacaqlar. Çox güman ki, layihə sentyabr-oktyabr aylarında reallaşacaq”.
Dekanın verdiyi məlumata görə, digər illərdən fərqli olaraq, yeni dərs ilində komunikasiya ilə bağlı bir sıra fənlər keçiriləcək.
“Yeni fənnlər, əsasən multimedia, onlayn jurnalistikası üzrə proqramların hazırlanma prosesi gedir. Bununla bağlı tədris proqramlarında müəyyən tematik bölgülər olacaq.Yeni dərs ilində multimedia jurnalistikasına aid dərslər keçiriləcək”.
Xatırladaq ki, professor Şamil Vəliyev aprelin 24-dən dekan postunu tutub.
Nihadə Eyyubova
