Azərbaycanlı deputatlar Litva universitetinin rektoru ilə görüşüblər

Təhsil

16 May 2012, 11:34

Modern.az-ın məlumatına görə, Azərbaycanın millət vəkilləri Qənirə Paşayeva və Ceyhun Osmanlı Litva Pedaqoji Universitetinin rektoru Algirdas Gaizutis ilə görüşüblər.

Litvada keçirilən “Sosial Media və Gənclik” adlı IV Avrasiya Gənclik Forumunda iştirak edən deputatlar Azərbaycanın Litvadakı fövqaladə və səlahiyyətli səfiri Həsən Məmmədzadə və Litva Pedaqoji Universitetinin rektoru Algirdas Gaizutis ilə görüşüblər. Azərbaycanın bütün sahələrdə Litva ilə əməkdaşlığa böyük önəm verdiyini deyən millət vəkilləri iki ölkə arasında bütün sahələrdə əməkdaşlığın getdikcə daha da inkişaf etməsinin məmunluq yaratdığını deyiblər. Onlar yaxın günlərdə Azrbaycanın Təhsil naziri Misir Mərdanovun Litvaya planlaşdırılan səfərindən sonra iki ölkə arasında təhsil sahəsində əməkdaşlığın daha da genişlənəcəyinə ümidvar olduqlarını bildiriblər. 2007-2015-ci illər xaricdə təhsil proqramına bu ildən Litvanın 2 universitetinin də salındığını vurğulayan deputatlar bunu Azərbaycanın Litva ilə təhsil əlaqələrinin inkişafına verdiyi önəm olduğunu bildiriblər. Bu qərarın Litvada təhsil alan azərbaycanlı gənclərin sayının artmasına səbəb olacağını vurğulayan millət vəkilləri Qənirə Paşayeva və Ceyhun Osmanlı Litva hökumətinin qərarı ilə hər il 25 azərbaycanlı gəncə Litvada Litva hökuməti hesabına bu ölkədə təhsil alma imkanı yaradılmasının önəmini vurğulayıblar.

Litvanın da Azərbaycanla bütün sahələrdə, o cümlədən təhsil sahəsində əməkdaşlığı genişləndirməkdə maraqlı olduğunu deyən Litva Pedaqoji Universitetinin rektoru Algirdas Gaizutis Azərbaycanın Litvadakı səfirliyinin və azərbaycanlı diaspor təşkilatlarının təşəbbüsünü nəzərə alaraq Azərbaycanın tarixini və mədəniyyətini özündə əks etdirəcək Azərbaycan auditoriyasının yaratmağı planlaşdırdıqlarını bildirib. O,qyed edib ki, bu, Litvalı tələbələrin və universitetdə təhsil alan bütün gənclərin Azərbaycanla bağlı, onun tarixi, mədəniyyəti, həqiqətləri ilə bağlı daha geniş məlumatlar əldə edə bilməsinə, Azərbaycanı daha yaxından tanımasına imkan verəcək. Millət vəkilləri Qənirə Paşayeva və Ceyhun Osmanlı bunun çox önəmli bir layihə olduğunu bildiriblər və bunun üçün universitet rəhbərliyinə təşəkkür ediblər. Litva Pedaqoji Universitetinin rektoru Algirdas Gaizutis millət vəkillərini auditoriya açılan zaman universitetdə görməkdən məmun olacaqlarını deyib. Qənirə Paşayeva və Ceyhun Osmanlı rektor Algirdas Gaizutisi Azərbaycana dəvət ediblər. Rektor Universitetdə azərbaycanlı tələbələrin də təhsil alması barədə məlumat verib və əməkdaşlığın bundan sonra daha da genişlənəcəyinə ümidvar olduğunu bildirib.