Bu gün Türkmənistanın Azərbaycan Respublikasındakı səfiri T.Komekov Azərbaycan Xarici İşlər Nazirliyinə dəvət olunub və xarici işlər nazirinin müavini Xələf Xələfov tərəfindən qəbul edilib. Bu barədə Modern.az-a Xarici İşlər Nazirliyinin mətbuat xidməti məlumat verib.
Nazirliyin məlumatına görə, görüşdə bildirilib ki, 2008-ci ildə Azərbaycan Respublikası və Türkmənistan Prezidentləri arasında əldə olunan razılaşmaya əsasən tərəflər Azərbaycan və Türkmənistan sektorlarının dibinin kəsişdiyi sahələrdə Xəzər dənizinin dibinin bölgüsü ilə bağlı məsələlər razılaşdırılmayana qədər kəşfiyyat və hasilatla bağlı heç bir fəaliyyət həyata keçirməyəcəklər.
