İranın Azərbaycan səfiri öz vəzifəsinin icrasına davam edir. “Azadlıq” radiosunun məlumatına görə, bu haqda xəbər verən “Tehran Times” yazır ki, səfir Məhəmmədbağır Bəhrami cümə günü Bakıya qayıdıb.
May ayında Azərbaycan və İran arasındakı münasibətlər gərginləşmişdi. Bakıdakı İran səfirliyi qarşısında bir-birinin ardınca etiraz aksiyaları keçirilirdi.
”Tehran Times” yazır ki, mayın 11-də Bakıda İran səfriliyi qarşısında keçirilən aksiyada İranın müqəddəs dini dəyərlərinin alçaldılması və yüksək rütbəli rəsmilərin ünvanına səslənən təhqirlərə etiraz olaraq səfir Bahrami mayın 21-də məsləhətləşmələr üçün Bakıdan Tehrana çağırılmışdı. Mayın 22-də isə Azərbaycanın İrandakı səfiri Cavanşir Axundov İranın Xarici İşlər nazirliyinə çağırılmışdı.
İkitərəfli münasibətlərin gərginləşməsi xronologiyasına toxunan “Tehran Times” daha sonra yazır ki, Azərbaycan mayın 28-də İranın mədəniyyət nazirinin ölkəyə girişini qadağan edəndən sonra İran səfirliyi bəyanatla çıxış edərək bu addımı “qeyri-diplomatik” adlandırmışdı.
Xatırladırıq ki, may ayında İran “Eurovision” mahnı müsabiqəsinin Bakıda keçirilməsinə etiraz edərək Təbrizdəki Azərbaycan konsulluğu qarşısında etiraz aksiyaları təşkil etmişdi. Tehran mahnı müsabiqəsini seksual azlıqların adı ilə əlaqələndirməyə çalışırdı.
Modern.az
