Xorvatiyanın işgüzar dairələri arasında populyar olan “Poslovni dnevnik” qəzetində və poslovni.hr onlayn portalında “Ermənistan-Azərbaycan münaqişəsinin iqtisadi tərəfləri” adlı geniş məqalə dərc olunub.
Bu barədə Modern.az-a Azərbaycanın Xorvatiyadakı səfirliyindən məlumat verilib.
Bildirilib ki, məqalədə Azərbaycan Respublikası Xarici İşlər Nazirliyinin Ermənistan tərəfindən xarici şirkətlərin iştirakı ilə işğal olunmuş Azərbaycan ərazilərinin təbii sərvətlərinin qanunsuz istismarı barədə geniş hesabatına nəzər salınıb.
Qeyd olunub ki, Ermənistan geniş miqyaslı soyğunçuluq yolu ilə Fransa, ABŞ, Kanada, Avstraliya, İsveçrə və Rusiyadan erməni əsilli iş adamlarını və ya erməni diasporu ilə əlaqəli iş adamlarını Azərbaycan Respublikasının işğal olunmuş və artıq işğaldan azad edilmiş ərazilərimizdə qanunsuz iqtisadi və digər fəaliyyətə cəlb edib.
Qanunsuz fəaliyyətlə məşğul olan şirkətlərdən Franck Muller Group haqqında məlumat verilmişdir. Bu şirkətin baş icraçı direktoru, erməni separatçı rejiminin nəzarəti altında işğal altında olan Dağlıq Qarabağ bölgəsində olduğu kimi, Ermənistana da ən fəal sərmayəçi olan erməni əsilli Vartan Sirmakesdir.
Vartan Sirmakesin iştirak etdiyi layihələrdən biri də Azərbaycanın işğal altındakı Zəngilan bölgəsindəki Vajnali qızıl yatağının istismarıdır. Vardan Sirmakes Kəlbəcərdə Soyudlu qızıl yatağında da qanunsuz əməliyyatlar həyata keçirirdi. Azərbaycanın işğal olunmuş ərazilərində 205,3 ton sübut olunmuş qızıl və 251,1 ton gümüş ehtiyatı mövcuddur.
10 iyun 2020-ci il tarixində Avropa Parlamenti üzvləri tərəfindən Ermənistanla Dağlıq Qarabağ arasında yeni avtomobil yolunun tikintisinin qəbuledilməz olması ilə bağlı Birgə Bəyanatın mahiyyəti oxuculara çatdırılıb. Bir növ “boz zonaya” çevrilmiş ərazilərimizin yalnız Ermənistan deyil, beynəlxalq miqyasda da cinayətkarlar, maliyyə fırıldaqçıları və qanunsuz biznes üçün ideal bir məkana çevrilməsi vurğulanıb.
//www.poslovni.hr/
