Gəncə Şəhər İcra Hakimiyyətinin başçısı Niyazi Bayramovun tapşırıq və tövsiyyələrinə uyğun olaraq erməni təxribatı nəticəsində evləri yararsız hala düşən sakinlərlə növbəti görüş keçirilib.
Modern.az xəbər verir ki, görüş zamanı Azərbaycan Dövlət Aqrar Universitetinin yataqxanasında müvəqqəti məskunlaşan sakinlərlə söhbət aparılıb, onların fikir və təklifləri dinlənilib.
Gəncə Şəhər İcra Hakimiyyəti başçısının birinci müavini Səməd Tomuyev bildirib ki, erməni təxribatı nəticəsində evləri yararsız hala düşən sakinlərin həyat və məişət qayğıları dövlətin diqqət mərkəzində saxlanılır. Sakinlər istəklərinə uyğun olaraq gündəlik tələbat malları və geyimlərlə təmin edilirlər. Şəhər rəhbərliyi mütəmadi şəkildə ailələrin yaşam vəziyyəti ilə maraqlanır, qarşılaşdıqları çətinliklər dərhal aradan qaldırılır.
Vətəndaşlar onlara göstərilən diqqət və qayğıya görə ilk növbədə dövlət başçısı İlham Əliyev və ölkənin Birinci vitse-prezidenti Mehriban xanım Əliyevaya, habelə şəhər rəhbərliyinə dərin təşəkkürlərini ifadə ediblər.
Görüşdə ADAU-nun yataqxanasında müvəqqəti məskunlaşan balaca sakinlərə hədiyyələr təqdim olunub.
