Şəmkir rayonunda baş verən xoşagəlməz hadisələrlə bağlı yayılan xəbərlərə Daxili İşlər Nazirliyi aydınlıq gətirib. DİN-nin mətbuat xidmətinin rəhbəri Ehsan Zahidov Modern.az saytına bildirib ki, rayonda heç bir evə hücum edilməyib və heç kəs də xəsarət almayıb.
“Bunlar hamısı yalan informasiyadır. Sakinlər arasında yayılan bir şayiədir. Bu söz-söhbət çıxan gündən həmin hadisələr araşdırılıb, heç nə özünü doğrultmayıb. Bu, kimlərinsə sakinlər arasında yaydığı şayiədən başqa heç nə deyil”.
Nazirlik rəsmisi dünən rayonda baş verən bıçaqlanma hadisəsinə də münasibət bildirib: Doğrudur, dünən gecə 00:30 radələrində rayonda bıçaqlanma hadisəsi baş verib. Naməlum şəxs xuliqanlıq zəminində Əhmədəliyev Cəfərə bıçaqla qol nahiyyəsindən xəsarət yetirib. Şəmkir polisi dərhal hadisə yerinə gəlib, Şəmkir rayon Polis şöbəsində 221-ci maddə ilə cinayət işi qaldırılıb. Adi bir vətəndaşdır, onun hansı işlə məşğul olduğunu bilmirəm. Onu deyə bilərəm ki, həmin hadisə ilə bağlı dərhal polis tərəfindən cinayət işi qaldırılıb”
Nihadə Eyyubova
