Azərbaycanın sərbəst güləş üzrə olimpiya çempionları - Şəriş Şərifov və Toğrul Əsgərovun Serbiyanın paytaxtı Belqradda keçirilən Fərdi Dünya Kubokunda yığmanın heyətində yer almamalarının səbəbi bəlli olub.
Modern.az xəbər verir ki, 97 kq çəki dərəcəsində çıxış edən Şərifov öz istəyi ilə yarışda iştirakdan imtina edib. Onun yerinə gənc Şamil Zubairov Belqrada aparılıb.
Toğrul Əsgərov isə çəki problemi ilə üzləşib və bu səbəbdən Dünya Kubokuna qatılmayıb. 74 kq-a tam uyğunlaşmadığı üçün məşqçilər korpusu Əsgərovun iştirakını məsləhət görməyib.
79 kq-dakı Cəbrayıl Həsənov və 74 kq-dakı Hacımurad Hacıyev zədə səbəbindən siyahıda yer almayıblar.
Qeyd edək ki, Şərif Şərifov və Toğrul Əsgərov 2012-ci il London Yay Olimpiya Oyunlarında qızıl medal qazanıblar. Dünya Kubokuna dekabrın 18-də yekun vurulacaq. Azərbaycanı yarışda doqquz sərbəst güləşçi təmsil edir.
Xatırladaq ki, daha əvvəl titullu güləşçi Mariya Stadnik də yarışdan imtina edib (report).
Qeyd edək ki, Azərbaycan Güləş Federasiyası güləşçilərimizin yarışda iştirak etməməsinin səbəbini açıqlayıb:
“Şərif Şərifov yayda ayağından əməliyyat olunmuşdu. Bu səbəbdən hazırda bərpa dövrü keçir.
Toğrul Əsgərov isə topuğunda ağrılar hiss etdiyi üçün bu yarışda iştirak edə bilməyib. Cəbrayıl Həsənov da hazırda zədəlidir.
Bu səbəbdən məşqçilər korpusu onun çəkisində gənc Rəşad Yusifliyə şans verib" (oxu.az).
