Əcnəbi vətəndaşların yaratdığı QHT-lərə qrant veriləcəkmi? | Modern.az

Modern.az saytı bir müddət öncə Azərbaycanda yaşayan əcnəbilərin qeyri-hökumət təşkilatı yaratması haqda xəbər vermişdi. Belə ki, ölkəmizdə Çin Xalq Respublikasının, ABŞ-ın vətəndaşları QHT yaradıblar. Ədliyyə Nazirliyinin məlumatına görə, Azərbaycanda QHT yaratmaq üçün müraciət edən xarici vətəndaşların saylı az deyil.

Bəs əcnəbilərin yaratdığı qeyri-hökumət təşkilatlarına qrantlar ayrılırmı? Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, deputat Azay Quliyev məsələ ilə bağlı Modern.az-a danışıb. A.Quliyev bildirib ki, əcnəbi vətəndaşların Azərbaycanda QHT yaratması üçün heç bir problem yoxdur.

“Biz bunu normal qarşılayırıq. Azərbaycanda vətəndaşlığı olmayan əcnəbilər, digər dövlətlərin nümayəndələri sərbəst şəkildə qeyri-hökumət təşkilatı yarada bilərlər. Onlar da digər QHT-lər kimi bu sektorda təmsil oluna bilərlər. Onlar üçün bu sahədə heç bir məhdudiyyət qoyulmayıb. Əcnəbilər də Azərbaycan vətəndaşları kimi Ədliyyət Nazirliyinə müraciət edərək, QHT-lərini  qeydiyyatdan keçirə bilərlər. 2009-cu ildə qəbul olunan qanun bu imkanları əcnəbilər üçün yaratdı”, - deyə A.Quliyev bildirib.

Yerli QHT-lərlə yanaşı, əcnəbi vətəndaşların yaratdığı təşkilatlar QHT Şurasınımn elan etdiyi müsabiqələrdən qrant alarsa bu, təəccüb doğurmayacaq.

Anar RÜSTƏMOV